سعودی عرب: ختم شدہ وزٹ ویزوں کی توسیع کا آغاز

سعودی عرب میں مقیم غیر ملکی افراد کے لیے ایک اہم اعلان سامنے آیا ہے۔ سعودی محکمہ پاسپورٹ نے تصدیق کی ہے کہ مختلف اقسام کے ختم شدہ وزٹ ویزوں کی توسیع کا سلسلہ باقاعدہ طور پر شروع کر دیا گیا ہے۔ محکمہ پاسپورٹ نے وضاحت کی ہے کہ یہ فیصلہ اُن غیر ملکیوں کے لیے ریلیف فراہم کرنے کے لیے کیا گیا ہے جو کسی وجہ سے مقررہ مدت میں ملک نہ چھوڑ سکے اور اب ختم شدہ وزٹ ویزے کے ساتھ موجود ہیں۔ یہ اقدام ان افراد کو قانونی طریقے سے حتمی روانگی کا موقع فراہم کرنے کے لیے اٹھایا گیا ہے تاکہ وہ جرمانوں یا قانونی خلاف ورزیوں سے بچ سکیں۔

اہم ہدایات:

• تمام وزٹ ویزہ ہولڈرز "ابشر پلیٹ فارم” یا دیگر مجاز سرکاری ذرائع سے اپنی ویزے کی حیثیت کی نگرانی کریں۔

• ویزے کی میعاد ختم ہونے سے قبل اس میں توسیع کی درخواست دے کر قانونی حیثیت برقرار رکھیں۔

• توسیع کا عمل وقت کے اندر مکمل نہ کرنے کی صورت میں جرمانے، گرفتاری یا بلیک لسٹنگ جیسے قانونی نتائج کا سامنا کرنا پڑ سکتا ہے۔

جوازات کا مؤقف:

"ہمارا مقصد غیر ملکی مہمانوں کو قانونی سہولیات فراہم کرنا ہے تاکہ ان کی روانگی ایک باوقار اور ضابطے کے مطابق عمل ہو، بغیر کسی رکاوٹ یا سزا کے۔”

یہ فیصلہ ان ہزاروں غیر ملکیوں کے لیے انتہائی اہمیت کا حامل ہے جو عمرہ، زیارت یا فیملی وزٹ ویزے پر سعودی عرب آئے تھے اور کسی مجبوری کے باعث مقررہ وقت میں واپسی نہ کر سکے۔