کرسٹیانو رونالڈو کا بڑا اعلان: "سعودی عرب اب میرا گھر ہے”

عالمی شہرت یافتہ فٹبال اسٹار کرسٹیانو رونالڈو نے اپنے دل کی بات سب کے سامنے رکھ دی .وہ اپنی باقی زندگی سعودی عرب میں گزارنے کا فیصلہ کر چکے ہیں۔ النصر کلب کی جانب سے جاری کردہ ویڈیو پیغام میں رونالڈو نے نہایت جذباتی انداز میں کہا:

"سعودی عرب ایک پرامن اور محفوظ ملک ہے، جہاں میرا خاندان خود کو بالکل گھر جیسا محسوس کرتا ہے۔ ہم یہاں بہت خوش ہیں، اسی لیے یہیں اپنی زندگی بسانے کا فیصلہ کیا ہے۔”

رونالڈو کا کہنا تھا کہ ان کا خاندان ہمیشہ ان کے فیصلوں کی حمایت کرتا ہے، اور سعودی معاشرہ ان کے دل کو بہت بھایا ہے۔ 2022 کے اختتام پر مانچسٹر یونائیٹڈ سے الوداع کہنے کے بعد، رونالڈو نے النصر کے ساتھ نیا سفر شروع کیا—اور اب اس سفر کو 2027 تک بڑھا دیا گیا ہے۔ یہ معاہدہ صرف ایک فٹبال معاہدہ نہیں، بلکہ سعودی عرب میں ان کی نئی زندگی کا آغاز ہے۔ رونالڈو نے بتایا کہ انہوں نے حالیہ فیفا کلب ورلڈ کپ میں شرکت کی پیشکش کو آرام اور تیاری کی خاطر مسترد کیا کیونکہ ان کا فوکس النصر کے ساتھ بڑا ٹائٹل جیتنے پر ہے۔ان کا کہنا تھا:

"سعودی پرو لیگ دنیا کی بہترین 5 فٹبال لیگز میں شامل ہو چکی ہے۔ اور مجھے یقین ہے کہ 2034 کا فیفا ورلڈ کپ دنیا کا سب سے یادگار ایونٹ ہوگا۔”

رونالڈو نے سعودی عرب کے کلچر، محبت کرنے والے عوام اور خاندانی ماحول کی دل کھول کر تعریف کی۔

"یہ ملک میرے لیے صرف ایک فٹبال مقام نہیں رہا، بلکہ اب یہ میرا مستقل گھر ہے۔”