خیبرپختونخوا میں بارشوں اور کلاؤڈ برسٹ سے تباہی، 48 گھنٹوں میں 307 اموات

صوبائی ڈیزاسٹر مینجمنٹ اتھارٹی (پی ڈی ایم اے) کے مطابق خیبرپختونخوا میں طوفانی بارشوں اور کلاؤڈ برسٹ کے باعث آنے والے سیلاب نے تباہی مچا دی، جس کے نتیجے میں گزشتہ 48 گھنٹوں کے دوران اموات کی تعداد 307 تک پہنچ گئی ہے۔ رپورٹ کے مطابق سب سے زیادہ نقصان ضلع بونیر میں ہوا، جہاں اب تک 184 افراد جاں بحق ہوئے، شانگلہ میں 36، مانسہرہ میں 23، سوات میں 22، باجوڑ میں 21، بٹ گرام میں 15 اور دیر میں 5 افراد جاں بحق ہوئے ہیں۔ زخمیوں کی تعداد 23 بتائی گئی ہے جن میں 17 مرد، 4 خواتین اور 2 بچے شامل ہیں۔ پی ڈی ایم اے کے مطابق جاں بحق ہونے والوں میں 279 مرد، 15 خواتین اور 13 بچے شامل ہیں۔ بارشوں اور فلش فلڈ کے باعث صوبے بھر میں مجموعی طور پر 74 مکانات کو نقصان پہنچا ہے، جن میں سے 11 مکمل تباہ ہوگئے جبکہ 63 جزوی طور پر متاثر ہوئے۔

امدادی کارروائیاں اور حکومتی اقدامات

پی ڈی ایم اے کا کہنا ہے کہ متاثرہ اضلاع میں ضلعی انتظامیہ اور امدادی ٹیمیں مسلسل رابطے میں ہیں، صورت حال کی کڑی نگرانی کی جا رہی ہے اور سیاحتی مقامات کی شاہراہوں کی بحالی کے لیے تمام وسائل بروئے کار لائے جا رہے ہیں۔ وزیراعلیٰ خیبرپختونخوا نے فوری امدادی فنڈز جاری کرنے اور تمام اداروں کو ریلیف سرگرمیاں تیز کرنے کی ہدایت دی ہے۔

فوج اور ایف سی کا فلڈ ریلیف آپریشن

پاک فوج اور فرنٹیئر کور (ایف سی) کی جانب سے بونیر، سوات اور باجوڑ میں ریلیف آپریشن جاری ہے۔ فوجی ہیلی کاپٹرز کے ذریعے متاثرین کو راشن اور دیگر ضروری سامان فراہم کیا جا رہا ہے، جبکہ لوگوں کو محفوظ مقامات پر منتقل کرنے کا عمل تیز کر دیا گیا ہے۔ فوج کے مزید دستے بھی امدادی سرگرمیوں کے لیے روانہ کر دیے گئے ہیں اور آپریشن متاثرین کی مکمل بحالی تک جاری رہے گا۔

عوام کے لیے ہدایت

پی ڈی ایم اے نے شہریوں کو موسمی صورتحال سے باخبر رہنے اور احتیاطی تدابیر اختیار کرنے کی اپیل کی ہے۔ ایمرجنسی آپریشن سینٹر 24 گھنٹے فعال ہے اور عوام کسی بھی ہنگامی صورت حال یا اطلاع کے لیے فری ہیلپ لائن 1700 پر رابطہ کر سکتے ہیں۔