نوجوان افسران قوم کی خدمت کو اپنا نصب العین بنائیں

فیلڈ مارشل سید عاصم منیر کی زیر صدارت سول سروسز اکیڈمی کے 52ویں کامن ٹریننگ پروگرام کے افسران کے ساتھ ہونے والی یہ خصوصی نشست قومی اداروں کے درمیان ہم آہنگی اور تعاون کا ایک روشن مظہر تھی۔ آرمی آڈیٹوریم میں منعقدہ اس ملاقات میں فیلڈ مارشل نے نہ صرف نوجوان افسران کو قوم کے روشن مستقبل کا معمار قرار دیا بلکہ انہیں تاکید کی کہ وہ دیانت، خلوص، قربانی اور پیشہ ورانہ مہارت کو اپنا شعار بنائیں۔ انہوں نے واضح کیا کہ ایک فعال، ذہین اور باصلاحیت سول بیوروکریسی ہی ریاستی مشینری کو مضبوط بنیاد فراہم کر سکتی ہے۔ فیلڈ مارشل نے افواجِ پاکستان کے خطے میں قیام امن، استحکام اور ملکی دفاع میں کردار کو اجاگر کرتے ہوئے کہا کہ قومی خدمت ایک مقدس فریضہ ہے، جسے ایمانداری اور نیک نیتی سے انجام دینا ہی اصل کامیابی ہے۔ آئی ایس پی آر کے مطابق، نوجوان افسران نے کشمیر، خیبرپختونخوا اور بلوچستان جیسے اہم اور حساس علاقوں میں عسکری اداروں کے ساتھ مل کر کام کیا اور تینوں مسلح افواج کے مختلف شعبوں میں قیمتی تجربات حاصل کیے۔ ان تجربات نے ان کے وژن، ادراک اور فیصلہ سازی کی صلاحیتوں کو جلا بخشی۔ ملاقات کے اختتام پر ایک جامع سوال و جواب کا سیشن بھی ہوا، جس میں شرکاء نے نہایت دلچسپی سے حصہ لیا اور اپنی معلومات کو مزید وسعت دی۔ افسران نے اس نشست کو ایک تاریخی موقع قرار دیا اور فیلڈ مارشل سید عاصم منیر کی جانب سے ملنے والی رہنمائی کو اپنے کیریئر کے لیے ایک قیمتی اثاثہ قرار دیا۔ یہ نشست نہ صرف قومی یکجہتی کا اظہار تھی بلکہ ایک نئے جذبے، ولولے اور عزم کے ساتھ پاکستان کی خدمت کے عہد کی تجدید بھی۔