اسحاق ڈار اور امریکی وزیر خارجہ مارکو روبیو کا رابطہ

پاکستان کے نائب وزیراعظم و وزیر خارجہ سینیٹر اسحاق ڈار اور امریکہ کے وزیر خارجہ مارکو روبیو کے درمیان ایک اہم رابطہ ہوا، جس میں دو طرفہ امور کے وسیع تر دائرہ کار پر تبادلہ خیال کیا گیا۔دفتر خارجہ کی جانب سے جاری اعلامیے کے مطابق، دونوں رہنماؤں نے نہ صرف دوطرفہ تعلقات پر گفتگو کی بلکہ علاقائی اور عالمی حالات پر بھی تفصیلی رائے کا تبادلہ کیا۔ اس موقع پر باہمی دلچسپی کے شعبوں میں تعاون کو مزید وسعت دینے اور رابطے برقرار رکھنے پر اتفاق کیا گیا۔ دفتر خارجہ کے بیان میں کہا گیا کہ اس رابطے کا مقصد پاکستان اور امریکہ کے درمیان اعتماد اور شراکت داری کو فروغ دینا ہے، تاکہ سیاسی، معاشی، اور سلامتی سے متعلق معاملات میں موثر پیش رفت ممکن ہو سکے۔ واضح رہے کہ اس سے قبل بھی 29 جولائی کو نائب وزیراعظم و وزیر خارجہ اسحاق ڈار اور امریکی وزیر خارجہ مارکو روبیو کے درمیان ٹیلیفونک گفتگو ہوئی تھی، جس میں دوطرفہ تعلقات اور تعاون کے امکانات پر تفصیلی بات چیت ہوئی تھی۔