بھارتی قیادت سیزفائر برداشت نہیں کر پا رہی، پاکستان نے مؤثر ردعمل دیا

نائب وزیراعظم اور وزیر خارجہ اسحاق ڈار نے کہا ہے کہ پاک بھارت سیز فائر مکمل طور پر مؤثر ہے، مگر نئی دہلی کی سیاسی قیادت اس حقیقت کو ہضم نہیں کر پا رہی۔ ان کا کہنا تھا کہ پاکستان نے دشمن کی اشتعال انگیزیوں کا بھرپور جواب دیا ہے اور ملکی دفاع ہر حال میں ناقابلِ تسخیر رہے گا۔ ملائیشیا کے دارالحکومت کوالا لمپور میں ایک تقریب سے خطاب کرتے ہوئے اسحاق ڈار نے کہا کہ پاکستان مشکل اقتصادی حالات کے باوجود بحالی کی جانب گامزن ہے اور اگلا ہدف دنیا کی بڑی معیشتوں کے گروپ جی 20 میں شمولیت ہے۔

 بھارت کا رویہ غیر سنجیدہ، سندھ طاس معاہدے کی معطلی قابلِ مذمت

وزیر خارجہ نے بھارت پر تنقید کرتے ہوئے کہا کہ نئی دہلی نے سندھ طاس معاہدے کو یکطرفہ طور پر معطل کر کے غیر سنجیدہ اور اشتعال انگیز طرز عمل اختیار کیا، تاہم پاکستان نے واضح کر دیا ہے کہ بھارت نہ تو پاکستان کا پانی روک سکتا ہے اور نہ ہی دریاؤں کے قدرتی بہاؤ میں تبدیلی کر سکتا ہے۔

 دشمن کے جنگی طیاروں کو تباہ کیا، بھارتی میزائل سکھ آبادی پر گرانے کا دعویٰ

اسحاق ڈار کے مطابق قومی سلامتی کمیٹی کے اجلاس میں بھارت کو مؤثر جواب دینے کا متفقہ فیصلہ کیا گیا تھا، جس کے بعد پاکستانی فضائیہ نے 6 بھارتی جنگی طیارے تباہ کیے، جن میں 4 جدید رافیل طیارے بھی شامل تھے۔ انہوں نے دعویٰ کیا کہ بھارت نے جان بوجھ کر اپنے 2 میزائل سکھ برادری کے علاقے میں گرائے تاکہ اپنی ہی قوم کو اشتعال دلایا جا سکے، تاہم بین الاقوامی برادری نے بھارتی بیانیے کو مکمل طور پر مسترد کر دیا۔

 امریکی وزیر خارجہ کی صبح 8 بجے کال، بھارت نے سیزفائر کی درخواست کی

اسحاق ڈار نے کہا کہ ایک موقع پر امریکی وزیر خارجہ نے صبح سوا 8 بجے فون پر اطلاع دی کہ بھارت سیز فائر چاہتا ہے۔ انہوں نے کہا کہ جنگ کا آغاز بھی بھارت نے کیا اور خاتمے کی درخواست بھی اسی نے کی۔

 پاکستانی فضائی حدود بند، بھارت عالمی سطح پر تنہائی کا شکار

وزیر خارجہ کا کہنا تھا کہ سندھ طاس معاہدے کی خلاف ورزی کے ردعمل میں پاکستان نے بھارتی ایئرلائنز کے لیے اپنی فضائی حدود بند کر دیں، جس سے بھارت کو شدید سفارتی اور تجارتی دباؤ کا سامنا ہے۔

 افغان پالیسی پر بھی تنقید، ملکی سلامتی کو نقصان پہنچا

افغانستان سے متعلق بات کرتے ہوئے نائب وزیراعظم نے کہا کہ "کابل میں چائے پینے” اور دہشت گردوں کے لیے بارڈر کھولنے جیسی پالیسیوں نے پاکستان کو ناقابلِ تلافی نقصان پہنچایا۔انہوں نے کہا کہ پاکستان کا میزائل پروگرام دشمن کے دانت کھٹے کرنے کی صلاحیت رکھتا ہے اور ملکی دفاع ہر سطح پر محفوظ اور مؤثر ہاتھوں میں ہے۔