اسلام آباد کے تھانوں کو اسمارٹ پولیس اسٹیشن کرنے کا حکم

اسلام آباد میں وفاقی وزیر داخلہ محسن نقوی کی صدارت میں تھانوں کی اپ گریڈیشن پر پیش رفت سے متعلق جائزہ اجلاس ہوا۔ اس موقع پر  وزیر داخلہ نے اسلام آباد  کے تھانوں کو اسمارٹ پولیس اسٹیشن کی طرز پر اپ گریڈ کرنے کا حکم دے دیا۔ وفاقی وزیر کا کہنا تھا کہ  روایتی تھانے خوف کی علامت بن چکے ہیں، سائل آنے سے پہلے کئی بار سوچتا ہے۔ خود بھی تھانوں کے دورے کرچکا ہوں ، اس دوران جو حالت زار دیکھی وہ ناقابل بیان ہے۔ عالمی معیار کا شہر بنانے کے لیے بلاتاخیر اسمارٹ پولیسنگ کی طرف جانا ہے۔ اسمارٹ پولیس اسٹیشن کے لیے ہر ممکن وسائل دیں گے۔ محسن نقوی کے مطابق خوش اخلاق و تعلیم یافتہ پولیس افسران کو اسمارٹ پولیس اسٹیشن میں تعینات کیا جائے گا۔ مرحلہ وار پروگرام کے تحت تھانوں کو اپ گریڈ کرکے اسمارٹ پولیس اسٹیشن میں تبدیل کیا جائے گا۔ اپ گریڈیشن کے لیے کم لاگت کے ساتھ معیاری ڈیزائن تیار کیا جائے ۔ اس سلسلے میں انہوں نے دیگر عمارتوں میں قائم تھانوں کے لیے اراضی کی نشاندہی کی ہدایت بھی کی۔