ایرانی ٹیم کھیلنے آئی تو ان کی زندگی کو خطرہ لاحق ہوگا، ٹرمپ

امریکی صدر ڈونلڈ ٹرمپ نے ایک بار پھر عالمی سطح پر تنازعہ کھڑا کر دیا ہے، جب انہوں نے ایران کی قومی فٹبال ٹیم کو فیفا ورلڈ کپ 2026 میں شرکت سے گریز کرنے کا مشورہ دیا اور کہا کہ یہ ان کی اپنی جان و سلامتی کے لیے بہتر ہوگا۔

🚨📲 𝗕𝗥𝗘𝗔𝗞𝗜𝗡𝗚: Donald Trump on Truth Social, recommending that Iran should not attend the World Cup. pic.twitter.com/VEDwDz9U1Z

— The Touchline | 𝐓 (@TouchlineX) March 12, 2026

ٹرمپ نے اپنے سوشل میڈیا پلیٹ فارم ٹروتھ سوشل پر لکھا کہ ایرانی نیشنل ساکر ٹیم ورلڈ کپ میں خوش آمدید ہے، مگر وہ یہ مناسب نہیں سمجھتے کہ وہ وہاں موجود ہوں، کیونکہ یہ ان کی زندگی اور سلامتی کے لیے خطرناک ثابت ہو سکتا ہے۔ یہ بیان ایسے وقت میں سامنے آیا جب امریکا اور ایران کے درمیان جاری کشیدگی اور جنگ کی وجہ سے خطہ شدید تناؤ کا شکار ہے، اور ایران کے سپریم لیڈر کی شہادت سمیت حالیہ حملوں نے صورتحال کو مزید پیچیدہ بنا دیا ہے۔

ورلڈ کپ 2026، جو 11 جون سے 19 جولائی تک امریکا، کینیڈا اور میکسیکو میں مشترکہ طور پر منعقد ہوگا، پہلے ہی تاریخی تنازعات کا شکار نظر آ رہا ہے۔ ایران کی ٹیم نے ایشیائی کوالیفائنگ میں گروپ اے میں پہلی پوزیشن حاصل کر کے مسلسل چوتھی بار ورلڈ کپ کے لیے کوالیفائی کیا تھا، مگر اب سیاسی اور فوجی حالات نے ان کی شرکت کو شدید غیر یقینی بنا دیا ہے۔ایرانی فٹبال فیڈریشن کے سربراہ مہدی تاج نے واضح کیا کہ موجودہ حالات میں ورلڈ کپ میں شرکت انتہائی مشکل دکھائی دیتی ہے۔ اسی طرح ایران کے وزیر کھیل نے ٹی وی انٹرویو میں کہا کہ حالیہ حملوں اور کشیدگی کے بعد ٹیم کے لیے ٹورنامنٹ میں حصہ لینا ممکن نہیں رہا۔ ایرانی حکام کا موقف ہے کہ کھلاڑیوں کی سلامتی اور قومی وقار دونوں داؤ پر ہیں۔دوسری جانب فیفا کے صدر گیانی انفینٹینو نے چند دن قبل اعلان کیا تھا کہ انہیں امریکی صدر ٹرمپ سے یقین دہانی ملی ہے کہ ایرانی ٹیم کو ٹورنامنٹ میں خوش آمدید کہا جائے گا، کیونکہ فٹبال دنیا کو جوڑنے اور امن کا پیغام دینے کا ذریعہ ہے۔ ٹرمپ نے بھی فیفا صدر سے ملاقات میں ایران کی شرکت کو خوش آمدید کہا تھا، مگر اب ان کا تازہ بیان اس یقین دہانی کے برعکس ایک انتباہ کی شکل میں سامنے آیا ہے۔