پاکستان میں تعینات ایران کے سفیر رضا امیری مقدم نے کہا ہے کہ ایران پر صہیونی جارحیت کے خلاف پاکستانی حکومت اور عوام کی جانب سے دکھائی گئی یکجہتی کو ایرانی قوم کبھی فراموش نہیں کرے گی۔ اپنے بیان میں ایرانی سفیر کا کہنا تھا کہ پاکستان نے جس وقار اور بہادری کے ساتھ ایران کا ساتھ دیا، وہ قابلِ ستائش ہے۔ انہوں نے کہا کہ ایران ایک عظیم اور فیصلہ کن فتح کا جشن منا رہا ہے اور اس موقع پر پاکستان کی حمایت نے دوطرفہ تعلقات کو نئی بلندیوں پر پہنچایا ہے۔ رضا امیری مقدم نے صدر مملکت آصف علی زرداری، وزیر اعظم شہباز شریف، فیلڈ مارشل عاصم منیر، نائب وزیر اعظم اسحاق ڈار، وزیر دفاع خواجہ آصف، اراکین پارلیمنٹ، علمائے کرام، میڈیا اور سیاسی قیادت کا خصوصی طور پر شکریہ ادا کیا۔ ایرانی سفیر نے وزارت خارجہ پاکستان کی بھی تعریف کی، جس نے اقوام متحدہ، سلامتی کونسل اور اسلامی تعاون تنظیم (OIC) جیسے عالمی پلیٹ فارمز پر ایران کی بھرپور وکالت کی۔ ایرانی سفیر کا کہنا تھا کہ ایران اور پاکستان نے ہمیشہ یکجہتی اور بھائی چارے کی مثالیں قائم کی ہیں، اور موجودہ صورتحال میں یہ تعلق مزید مضبوط ہوا ہے۔ آخر میں انہوں نے کہا کہ یہ فتح مسلم امہ کی اجتماعی یادداشت میں ایک روشن علامت کے طور پر ہمیشہ یاد رکھی جائے گی — فخر، خود اعتمادی اور باطل پر حق کی جیت کی علامت۔
ایرانی سفیر کا اسرائیلی جارحیت کے خلاف حمایت پر پاکستان سے اظہارِ تشکر
Discussion about this post