پنجاب میں مفت وائی فائی کا دائرہ مزید بڑھا دیا گیا

پنجاب حکومت نے شہریوں کے لیے ایک اور سہولت فراہم کر دی۔ وزیراعلیٰ پنجاب کی ہدایت پر مختلف اضلاع میں فری وائی فائی سروس کو مزید علاقوں تک پھیلا دیا گیا ہے۔ سیف سٹیز کے ترجمان کے مطابق لاہور میں فری وائی فائی کی سہولت اب 230 کے بجائے 430 مقامات پر دستیاب ہے۔ اس کے علاوہ پہلے 11 اضلاع میں یہ سروس موجود تھی، اب اسے 22 اضلاع تک بڑھا دیا گیا ہے۔ پنجاب کے 22 اضلاع کے 710 مقامات پر اب شہری مفت انٹرنیٹ استعمال کر سکتے ہیں۔ وائی فائی سروس کو جدید ٹیکنالوجی "وائی فائی 6” پر منتقل کر دیا گیا ہے تاکہ صارفین کو تیز رفتار انٹرنیٹ مل سکے۔

ترجمان کا کہنا ہے کہ اب تک 3 کروڑ 72 لاکھ سے زائد صارفین اس سہولت سے فائدہ اٹھا چکے ہیں اور 905 ٹیرا بائٹس ڈیٹا استعمال ہو چکا ہے۔ حکام کے مطابق یہ وائی فائی سروس ایمرجنسی اور اہم کاموں کے لیے دی گئی ہے، اسے تفریح یا ویڈیو دیکھنے کے لیے استعمال نہ کیا جائے۔ پنجاب حکومت کا کہنا ہے کہ جلد یہ سہولت پورے صوبے تک پہنچا دی جائے گی۔