وزیر خزانہ کی آئی ایم ایف وفد کو معاشی صورتحال اور اصلاحاتی ایجنڈے پر بریفنگ

اسلام آباد میں  عالمی مالیاتی ادارے یعنی آئی ایم ایف  کے وفد نے وزیر خزانہ محمد اورنگزیب سے ملاقات کی ہے، اس موقع پر  وزیر خزانہ نے آئی ایم ایف کو پاکستان کی معاشی صورتحال اور اصلاحات کے ایجنڈے پر بریف کیا۔ ملاقات میں سیکریٹری خزانہ اور چیئرمین ایف بی آر بھی شریک تھے۔ یاد رہے کہ آئی ایم ایف کا وفد پیر کو پاکستان پہنچا تھا۔ پہلے مرحلے میں آئی ایم ایف وفد کے ساتھ تکنیکی سطح کے مذاکرات ہوں گے، پاکستان اور آئی ایم ایف کے درمیان کلائمیٹ فنانسنگ پر بھی گفتگو ہوگی، جائزے کی کامیابی پرپاکستان کو تقریباً ایک ارب ڈالرز کی اگلی قسط جاری کی جائے گی۔  پاکستان اورآئی ایم ایف کے درمیان مذاکرات 14 مارچ تک جاری رہیں گے، پاکستان کے لیے تقریباً ایک ارب ڈالرز کلائمٹ فنانسنگ کا بھی فیصلہ ہوگا۔ آئی ایم ایف وفد کی قیادت مشن چیف نیتھن پورٹر کریں گے، دوسرے مرحلے میں پاکستان اور آئی ایم ایف کے درمیان پالیسی لیول مذاکرات ہوں گے، پاکستان 7 ارب ڈالرز قرض پروگرام کی شرائط پر عملدرآمد رپورٹ پیش کرے گا۔ اس موقع پر پاکستان رواں مالی سال کی پہلی ششماہی رپورٹ آئی ایم ایف کو پیش کرے گا، آئی ایم ایف وفد پاور ڈویژن اور نیپرا حکام کے ساتھ مذاکرات کرے گا، آئی ایم ایف وفد کی صوبائی حکام کے ساتھ بھی ملاقاتیں ہوں گی۔