بھارتی پنجابی فلم ’سردار جی 3‘ کا ٹریلر ریلیز، ہانیہ عامر کی موجودگی

بھارتی پنجابی فلم ’سردار جی 3‘ کا آفیشل ٹریلر یوٹیوب پر ریلیز کر دیا گیا ہے، جس میں پاکستانی اداکارہ ہانیہ عامر کو نمایاں طور پر دکھایا گیا ہے۔ اس سے قبل قیاس آرائیاں کی جا رہی تھیں کہ پاک بھارت کشیدگی کے باعث بھارت میں پاکستانی فنکاروں پر پابندی کے تحت ہانیہ کا کردار فلم سے نکال دیا گیا ہے، اور فلم کے کچھ مناظر دوبارہ برطانیہ میں شوٹ کیے گئے ہیں۔ تاہم ٹریلر نے ان تمام افواہوں کو غلط ثابت کر دیا۔ ہانیہ عامر نہ صرف فلم میں موجود ہیں بلکہ ٹریلر کے متعدد مناظر میں نمایاں طور پر نظر آ رہی ہیں، جس پر ان کے مداحوں نے خوشی کا اظہار کیا ہے۔ فلم کی کاسٹ میں دلجیت دوسانجھ، نیرو باجوا، ہانیہ عامر، ناصر چنیوتی اور دیگر معروف پنجابی اداکار شامل ہیں۔ فلم کو مکمل طور پر برطانیہ میں شوٹ کیا گیا ہے، جس کے باعث اس میں بین الاقوامی لوکیشنز اور اعلیٰ پروڈکشن ویلیو کا بھرپور اظہار کیا گیا ہے۔

ٹریلر کے منظرعام پر آتے ہی سوشل میڈیا پر مداحوں نے بھرپور ردِعمل دیا۔ ایک صارف نے تبصرہ کیا کہ "اب کہاں گئے وہ لوگ جو کہتے تھے کہ ہانیہ کو فلم سے نکال دیا گیا ہے؟” ایک اور مداح نے لکھا، "میرے ہمسفر سے لے کر کبھی میں کبھی تم اور اب پنجابی فلم انڈسٹری میں، ہانیہ نے اپنی صلاحیتوں کا لوہا منوا لیا ہے۔” پاکستانی شائقین کی جانب سے دلجیت دوسانجھ کے لیے بھی محبت کا اظہار دیکھنے میں آیا۔ کئی صارفین نے ان کے لیے دعائیں کیں اور لکھا کہ پاکستانیوں کے دلوں میں ان کے لیے بے پناہ عزت ہے۔ یہ فلم 27 جون 2025ء کو دنیا بھر میں ریلیز کی جائے گی، اور فلمی تجزیہ کاروں کے مطابق، یہ فلم باکس آفس پر شاندار کامیابی حاصل کرنے کی بھرپور صلاحیت رکھتی ہے۔