جی این ایم آئی کے زیر اہتمام ریڈیو کے عالمی دن پر کانفرنس

سندھ اور بلوچستان میں ریڈیو براڈکاسٹنگ کے مستقبل کا جائزہ لینے کے لیے میڈیا پروفیشنلز، پالیسی سازوں اور ریڈیو سے منسلک افراد نے کراچی میں ریڈیو میڈیا کانفرنس 2025 میں شرکت کی۔ گلوبل نیبر ہوڈ فار میڈیا انوویشن (جی این ایم آئی) کے زیر اہتمام امریکی قونصل خانہ کراچی کے تعاون سے آرٹس کونسل آف پاکستان میں ریڈیو کے عالمی دن کی مناسبت سے یہ کانفرنس منعقد کی گئی ۔کانفرنس میں  مختلف موضوعات پر تبادلہ خیال، ریڈیو میں ڈیجیٹل تبدیلی، کمیونٹی کی شمولیت اور ابھرتے ہوئے میڈیا منظرنامے میں طویل مدتی استحکام پر توجہ مرکوز تھی۔

کانفرنس کے افتتاحی کلمات ادا کرتے ہوئے جی این ایم آئی کی صدر ناجیہ اشعر نے ریڈیو کے اثر و رسوخ اور کانٹینٹ کی تخلیق، سامعین کی شمولیت اور آمدنی پیدا کرنے میں مسلسل جدت طرازی کی ضرورت پر زور دیا۔  اُن کا کہنا تھا کہ "ریڈیو صرف ایک میڈیم سے کہیں زیادہ ہے۔ یہ کمیونیٹیز کے لئے ایک لائف لائن ہے، دہائیوں سے، اس نے معلومات کے خلا کو پر کیا ہے، پسماندہ آوازوں کو بااختیار بنایا ہے اور عوامی گفتگو کو مضبوط کیا ہے۔ جیسے جیسے ٹیکنالوجی ترقی کر رہی ہے، امریکہ ریڈیو کے صحافیوں کو ترقی دینے میں مدد کر رہا ہے-

اپنے خطاب میں امریکی قونصل خانہ کراچی کے پبلک افیئرز آفیسر مائیکل چیڈوک نے ایک مضبوط، محفوظ اور خوشحال مستقبل کی حمایت میں میڈیا کی جدت طرازی کے لیے امریکہ کے کردار پر روشنی ڈالی ۔ انہوں نے پاکستان کے پسماندہ علاقوں میں عوامی شمولیت کو فروغ دینے اور معاشی ترقی کو آگے بڑھانے میں ریڈیو کے اہم کردار پر روشنی ڈالی۔ مہمان خصوصی سندھ کے سینئر وزیر شرجیل انعام میمن نے بھی تقریب سے خطاب کیا ، جس میں ریڈیو کی رسائی کو بڑھانے، آزاد صحافت کے فروغ اور میڈیا کے شعبے میں جدت طرازی کی حوصلہ افزائی کے لئے صوبائی حکومت سندھ کے اقدامات کا خاکہ پیش کیا گیا۔

کانفرنس میں سینئر براڈکاسٹ جرنلسٹ اور پلس (یو ایس اے) کے صدر فیصل عزیز خان نے کمیونٹی پر مبنی پروگرامز سنانے کی اہمیت پر اظہار خیال کیا۔ انہوں نے کہا کہ "ریڈیو کا مستقبل ڈیجیٹل انضمام میں مضمر ہے – پوڈ کاسٹ ، موبائل اسٹریمنگ ، اور مصنوعی ذہانت سے چلنے والے مواد – جبکہ مستند پروگرامنگ کرنے میں ریڈیو کی بقا ہے۔

اس موقع پر”ریڈیو 2.0: سندھ اور بلوچستان میں کمیونٹی سینٹرڈ ریڈیو کی ڈیجیٹل براڈکاسٹنگ ” کے عنوان سے ایک پینل مباحثے میں ریڈیو سے منسلک سرکردہ آوازوں کو اکٹھا کیا گیا۔ سینئر براڈکاسٹ جرنلسٹ وسعت اللہ خان، میڈیا ماہر ذوالفقار شاہ، اسٹیشن ڈائریکٹر، ریڈیو پاکستان کراچی محبوب سرور، ڈائریکٹر جنرل، وزارت اطلاعات پاکستان ارم تنویر اور سی ای او، ایف ایم 91 سارہ طاہر خان شامل تھیں۔ سینئر براڈکاسٹ جرنلسٹ نادیہ نقی کی سربراہی میں پینل نے ڈیجیٹل ریڈیو میں ابھرتے ہوئے رجحانات، پائیدار اور جامع پروگرامنگ کی حکمت عملی اور غلط معلومات کا مقابلہ کرنے میں آزاد میڈیا کے کردار پر روشنی ڈالی۔

کانفرنس کا اختتام سندھ اور بلوچستان میں ریڈیو میڈیا کی طویل مدتی پائیداری کو یقینی بنانے کے لئے اسٹریٹجک روڈ میپ کے ساتھ ہوا۔ اہم سفارشات میں شامل ہیں:

• رسائی کو بڑھانے کے لئے ڈیجیٹل ریڈیو کے بنیادی ڈھانچے کو مضبوط کرنا۔
• کانٹینٹ کو بہتر بنانے کے لئے صحافیوں کے تربیتی پروگراموں میں سرمایہ کاری۔
• آزاد ریڈیو اسٹیشنوں کی سپورٹ کے لئے پائیدار فنڈنگ ماڈل تیار کرنا۔
• میڈیا کی آزادی اور مفاد عامہ کی پروگرامنگ کو برقرار رکھنے کے لئے پالیسی اصلاحات کی وکالت کرنا۔

جی این ایم آئی نے مقامی اور بین الاقوامی شراکت داروں کے ساتھ مل کر کام کرنے کے عزم کا اعادہ کیا تاکہ ریڈیو کو ڈیجیٹل دور میں منتقل کرنے میں مدد مل سکے جبکہ معلومات اور شہری مصروفیت کے قابل اعتماد ذریعہ کے طور پر اپنے کردار کو برقرار رکھا جا سکے۔