ٹیکساس میں ہولناک سیلاب: متعدد ہلاکتیں، صدر ٹرمپ کا دورہ متوقع،

ٹیکساس ہل کنٹری میں آنے والے ہولناک سیلاب نے تباہی کی نئی داستان رقم کر دی ہے، جہاں ہلاکتوں کی تعداد کم از کم 83 تک جا پہنچی ہے۔ افسوسناک طور پر ان میں 28 معصوم بچے بھی شامل ہیں۔ ریاست بھر میں ریسکیو اور تلاش کا عمل جاری ہے، جبکہ مزید ممکنہ بارشوں کے پیش نظر امدادی کارکنوں اور رضاکاروں کو محفوظ مقامات پر منتقل کیا جا رہا ہے۔

سیلاب سے سب سے زیادہ تباہی کیر کاؤنٹی میں

کیر کاؤنٹی کے شیرف لیری لیتھا کے مطابق، صرف ان کے علاقے میں 68 افراد ہلاک ہوئے، جن میں 28 بچے شامل ہیں۔ یہی علاقہ سیلاب کے مرکز میں رہا، جہاں دریائے گواڈالوپ طوفانی بارشوں کے بعد بپھر گیا اور اردگرد کی آبادی کو لپیٹ میں لے لیا۔

گورنر ایبٹ اور صدر ٹرمپ کی پریس کانفرنسز

ریاست کے گورنر گریگ ایبٹ نے اتوار کو ایک پریس کانفرنس میں تصدیق کی کہ دیگر علاقوں میں مزید 10 افراد ہلاک ہوئے اور کم از کم 41 افراد اب بھی لاپتا ہیں۔ادھر صدر ڈونلڈ ٹرمپ نے متاثرہ افراد سے تعزیت کا اظہار کرتے ہوئے اعلان کیا کہ وہ جمعہ کو متاثرہ علاقے کا دورہ کر سکتے ہیں۔ انہوں نے کہا:

"یہ دل دہلا دینے والا، ایک بالکل ہولناک واقعہ ہے۔ ہم آزمائش میں گھرے تمام افراد کے لیے دعاگو ہیں اور خدا ریاستِ ٹیکساس پر رحم فرمائے۔”

’کیمپ مسٹک‘ کی تباہی اور لاپتا لڑکیاں

سب سے زیادہ افسوسناک مناظر ’کیمپ مسٹک‘ نامی ایک تقریباً 100 سال پرانے سمر کیمپ میں دیکھے گئے، جہاں 10 نوعمر لڑکیاں اور ایک کونسلر تاحال لاپتا ہیں۔گورنر ایبٹ نے کہا:

"یہ دیکھنا دلخراش تھا کہ ننھے بچوں نے کیسے مصائب کا سامنا کیا۔ ہم لاپتا افراد کی تلاش جاری رکھیں گے۔”

ریسکیو، بارش اور نئے خطرات

ریاستی ایجنسیوں کے مطابق:

• 850 سے زائد افراد کو ریسکیو کیا گیا، کئی افراد درختوں سے چمٹے ہوئے تھے۔

• طوفان نے علاقے میں تقریباً 38 سینٹی میٹر (15 انچ) بارش برسائی۔

• دریائے گواڈالوپ کے ندی نالوں میں ایک اور "پانی کی دیوار” کے بہنے کی اطلاع ہے۔

فیما، کوسٹ گارڈ اور وفاقی اقدامات

اتوار کو فیڈرل ایمرجنسی مینجمنٹ ایجنسی (FEMA) کو متحرک کر دیا گیا، جو امدادی کارکنوں کو فوری وسائل فراہم کر رہی ہے۔ امریکی کوسٹ گارڈ کے ہیلی کاپٹر اور طیارے بھی کارروائی میں شامل ہو چکے ہیں۔

وفاقی کٹوتیوں پر سوالات

ماہرین نے اس بات پر تشویش کا اظہار کیا ہے کہ ٹرمپ حکومت کی جانب سے نیشنل ویدر سروس اور NOAA جیسے اداروں میں کی گئی کٹوتیوں نے ممکنہ طور پر حکام کو بروقت وارننگ دینے کی صلاحیت سے محروم کر دیا۔ سابق ڈائریکٹر رک اسپنراڈ نے کہا:

"ہم یقین سے نہیں کہہ سکتے، مگر عملے کی کمی نے یقینی طور پر پیش گوئی کی اہلیت کو متاثر کیا۔”

ٹرمپ کا ردعمل

اس معاملے پر سوالات کے جواب میں ٹرمپ نے سارا ملبہ بائیڈن انتظامیہ پر ڈالنے کی کوشش کی۔

"یہ بائیڈن کا سیٹ اپ تھا، لیکن میں الزام نہیں دوں گا… یہ ایک سو سالہ آفت ہے۔”