فواد خان کی فلم ’عبیر گُلال‘ نئی تاریخ اور نئے نام کے ساتھ ریلیز کیلئے تیار

تاخیر اور تنازع کا شکار پاکستانی سپر اسٹار فواد خان کی بھارتی فلم ابیر گُلال کی نئی ریلیز ڈیٹ سامنے آگئی۔ بھارتی میڈیا کے مطابق فلم اب نئے نام آبیر گُلال کے ساتھ 29 اگست 2025 کو ریلیز کی جائے گی۔ابتدائی طور پر فلم کی ریلیز 12 مئی کو متوقع تھی، تاہم اپریل کے آخر میں مقبوضہ کشمیر کے علاقے پہلگام میں سیاحوں پر ہونے والے مبنیہ  حملے کے بعد  فلم کی نمائش ملتوی کر دی گئی۔ بھارت نے اس حملے کا الزام پاکستان پر عائد کیا تھا، جسے اسلام آباد کئی بار مسترد کر چکا ہے۔ واقعے کے بعد بھارت نے پاکستانی فنکاروں اور یوٹیوب چینلز پر پابندیاں بھی عائد کر دی تھیں، جس کے نتیجے میں فواد خان کی فلم پر غیر معینہ مدت کیلئے پابندی لگ گئی تھی۔

ٹائمز آف انڈیا کی حالیہ رپورٹ کے مطابق فلم کو بھارتی پنجابی فلم سردار جی تھری کی طرز پر ریلیز کیا جائے گا، یعنی بھارت کے بجائے صرف بین الاقوامی مارکیٹ میں۔ فلمی ماہرین کا کہنا ہے کہ پاکستان مخالف ردعمل کے باعث اس کی بھارت میں ریلیز کے امکانات نہ ہونے کے برابر ہیں۔ یاد رہے کہ سردار جی تھری میں دلجیت دوسنجھ اور پاکستانی اداکارہ ہانیہ عامر نے مرکزی کردار ادا کیا تھا، تاہم بھارت میں ہانیہ عامر کی موجودگی کی وجہ سے فلم ریلیز نہ ہو سکی، مگر عالمی سطح پر اس نے زبردست کامیابی حاصل کی۔