معروف اداکار اور گیم شو میزبان فہد مصطفیٰ ایک نئی تنازعے کی زد میں آ گئے ہیں، جہاں اے آر وائی ڈیجیٹل کے سابق فوٹوگرافر عمر سعید نے ان پر سنگین الزامات عائد کیے ہیں۔ عمر سعید نے انسٹاگرام پر فہد مصطفیٰ کی ایک ویڈیو شیئر کی ہے جس میں وہ شو کے دوران کسی جانب اشارہ کرتے دکھائی دے رہے ہیں۔ اس ویڈیو کے ساتھ فوٹوگرافر نے لکھا کہ فہد مصطفیٰ نے شو کے سیٹ پر ان کے ساتھ کئی بار توہین آمیز رویہ اختیار کیا اور بعد ازاں انہیں ملازمت سے بھی نکلوا دیا۔ عمر سعید کا کہنا ہے کہ یہ ویڈیو دو سال پرانی ہے لیکن اب وہ اس وقت کو یاد کر کے اس حقیقت کو عوام کے سامنے لانا چاہتے ہیں۔ ان کا مزید کہنا تھا کہ وہ کئی بار فہد مصطفیٰ کے بدتمیز رویے کا سامنا کر چکے ہیں، مگر خاموشی اختیار کی کیونکہ ملازمت خطرے میں تھی۔ فوٹوگرافر نے دعویٰ کیا کہ:
"اس نے میرا کیریئر برباد کر دیا، لیکن ا اب میں اپنا کاروبار چلا رہا ہوں اور اتنا کما لیتا ہوں کہ اپنے خاندان کا پیٹ پال سکوں۔ اب وقت ہے کہ اس کا اصلی چہرہ سب کے سامنے آئے۔”
View this post on Instagram
یہ پوسٹ سوشل میڈیا پر وائرل ہو گئی ہے، جہاں صارفین کی جانب سے ملا جلا ردعمل دیکھنے کو ملا ہے۔ کئی صارفین نے فہد مصطفیٰ پر تنقید کی کہ وہ اکثر شو میں بھی بدتمیزی کرتے دکھائی دیتے ہیں، جبکہ کچھ صارفین نے فوٹوگرافر کی نیت پر سوال اٹھاتے ہوئے کہا کہ اگر وہ واقعی متاثر تھے تو اتنے عرصے بعد یہ معاملہ کیوں اٹھایا گیا۔ کچھ افراد نے یہ بھی سوال کیا کہ فہد مصطفیٰ کی تصاویر اب بھی عمر سعید کے سوشل میڈیا پر کیوں موجود ہیں۔ بعض نے فوٹوگرافر پر شہرت حاصل کرنے کی کوشش کا الزام بھی عائد کیا۔ دوسری جانب فہد مصطفیٰ نے تاحال اس معاملے پر کوئی ردعمل نہیں دیا۔ ان کے مداح اور ناقدین دونوں ہی ان کا مؤقف سننے کے منتظر ہیں۔ واضح رہے کہ فہد مصطفیٰ پاکستانی شوبز انڈسٹری کا ایک نمایاں نام ہیں۔ وہ “جیتو پاکستان” گیم شو کی میزبانی کے ساتھ ساتھ متعدد ڈراموں اور فلموں میں کامیاب اداکاری کر چکے ہیں۔ حالیہ دنوں میں ان کا ڈرامہ “کبھی میں کبھی تم” ہانیہ عامر کے ساتھ ناظرین میں مقبول ہوا ہے۔
Discussion about this post