دبئی : ماہرہ خان اور ہمایوں سعید کو اعزازی شیلڈز سے نوازا گیا

متحدہ عرب امارات میں پاکستان کے سفیر فیصل نیاز ترمذی نے قونصل جنرل حسین محمد اور پاکستانی سفارتخانے کے دیگر افسران کے ہمراہ دبئی میں ایک خصوصی تقریب میں شرکت کی، جہاں پاکستان کے معروف فلمی فنکاروں، ہمایوں سعید اور ماہرہ خان، کو پاکستانی سینما اور فنون لطیفہ کے میدان میں ان کی شاندار خدمات پر خراجِ تحسین پیش کیا گیا۔

تقریب کے دوران، سفیر ترمذی نے دونوں فنکاروں کو یادگاری شیلڈز پیش کیں، اور ان کی فنی خدمات، لگن، اور پاکستان کی ثقافت کو عالمی سطح پر روشناس کرانے کی کوششوں کو سراہا۔ اپنے خطاب میں انہوں نے کہا کہ پاکستان کا ثقافتی اور فنی ورثہ بے حد متنوع اور بھرپور ہے، اور تخلیقی صنعت عالمی سطح پر پاکستان کی شناخت بنانے میں ایک طاقتور "سوفٹ پاور” کے طور پر اپنا کردار ادا کر رہی ہے۔

اس موقع پر دبئی میں مقیم پاکستانی کمیونٹی کی بڑی تعداد نے شرکت کی، جنہوں نے دونوں فنکاروں کی پذیرائی میں بھرپور دلچسپی اور جوش و خروش کا مظاہرہ کیا۔ تقریب سے خطاب کرتے ہوئے ماہرہ خان اور ہمایوں سعید نے اس اعزاز پر سفیر فیصل نیاز ترمذی، قونصل جنرل، سفارتی عملے اور تمام شرکاء کا شکریہ ادا کیا۔ دونوں فنکاروں نے اس بات پر زور دیا کہ بیرون ملک پاکستانیوں کی طرف سے ملنے والی محبت اور حوصلہ افزائی ہی ان کے لیے اصل انعام ہے، جو انہیں اپنے کام میں مزید بہتری اور لگن کے ساتھ آگے بڑھنے کا حوصلہ دیتی ہے۔