پاکستانی ہارر فلم ’’دیمک‘‘ اب عالمی اسکرینوں پر

عیدالاضحیٰ 2025 پر پاکستان میں ریلیز ہونے والی ہارر فلم ’’دیمک‘‘ نے مقامی باکس آفس پر ریکارڈ کامیابی کے بعد اب دنیا بھر میں اپنی دہشت پھیلانے کی تیاری مکمل کر لی ہے۔ فلم کو شاندار کہانی، غیر معمولی مناظر اور جدید فلم سازی کے باعث اکتوبر 2025 میں یورپ، امریکا اور مشرق وسطیٰ کے ممالک میں ریلیز کیا جائے گا۔ ابتدائی طور پر فلم کو 17 اکتوبر کو امریکا، برطانیہ، کینیڈا اور دیگر یورپی ممالک میں جبکہ 23 اکتوبر کو خلیجی اور مشرق وسطیٰ ممالک میں پیش کیا جائے گا۔ پاکستان میں ’’دیمک‘‘ نے صرف چند ہفتوں میں تقریباً 18 کروڑ روپے کما کر ملکی تاریخ کی سب سے زیادہ بزنس کرنے والی ہارر فلم ہونے کا اعزاز حاصل کیا۔ رافِع راشدی کی ہدایت کاری اور عائشہ مظفر کی تحریر کردہ اس فلم کی کہانی ایک گھر میں بڑھتی ہوئی پراسرار اور ماورائی سرگرمیوں کے گرد گھومتی ہے، جہاں ساس اور بہو کے درمیان بگڑتے تعلقات کہانی کو مزید خوفناک اور پیچیدہ بنا دیتے ہیں۔ بیٹا ان دونوں کے درمیان پھنس کر رہ جاتا ہے، اور یہی کشیدگی فلم کو ایک منفرد رخ دیتی ہے۔

فلم کی میگا کاسٹ میں جاوید شیخ، ثمینہ پیرزادہ، بشریٰ انصاری، سونیا حسین، فیصل قریشی اور ثمن انصاری جیسے بڑے نام شامل ہیں، جنہوں نے اپنی جاندار اداکاری سے فلم کو یادگار بنا دیا۔ پاکستانی شائقین کی بے پناہ پذیرائی کے بعد ’’دیمک‘‘ اب دنیا بھر کے پردوں پر پاکستانی ہارر سینما کی نئی شناخت قائم کرنے جا رہی ہے۔