وفاقی آئینی عدالت کیلیے 3 بینچ تشکیل

چیف جسٹس امین الدین خان نے وفاقی آئینی عدالت کے باضابطہ آغاز کے ساتھ ہی تین اہم بینچ تشکیل دے دیے، جبکہ دو نئے ججز نے حلف اٹھا کر ذمہ داریاں سنبھال لی ہیں۔ اس طرح آئینی عدالت مکمل فعالیت کی طرف بڑھ چکی ہے اور آج سے باضابطہ طور پر مقدمات کی سماعت شروع کر رہی ہے۔بینچ نمبر 1 کی قیادت چیف جسٹس امین الدین خان کریں گے، جن کے ساتھ جسٹس علی باقی نجفی اور جسٹس ارشد حسین شاہ شامل ہوں گے۔بینچ نمبر 2 جسٹس حسن اظہر رضوی اور جسٹس کے کے آغا پر مشتمل ہوگا،
جبکہ بینچ نمبر 3 کی سربراہی جسٹس عامر فاروق کریں گے اور ان کے ساتھ جسٹس روزی خان بیٹھیں گے۔آئینی عدالت کے ججز جسٹس عامر فاروق اور جسٹس حسن اظہر رضوی کو سیکنڈ فلور پر چیمبرز الاٹ کیے گئے ہیں، جبکہ اسلام آباد ہائیکورٹ کے جسٹس محمد آصف اور جسٹس خادم حسین سومرو کی عدالتیں بھی اسی فلور پر منتقل کر دی گئی ہیں۔ اس منتقلی کے باعث دونوں ججز کی آج کی کاز لسٹ منسوخ کر دی گئی۔ نئے شامل ہونے والے ججز میں جسٹس روزی خان اور جسٹس ریٹائرڈ ارشد حسین شاہ نے اسلام آباد ہائیکورٹ میں منعقدہ سادگی مگر وقار سے بھرپور تقریب میں حلف اٹھایا۔ چیف جسٹس امین الدین خان نے دونوں ججز سے حلف لیا، جبکہ تقریب میں وفاقی اور آئینی عدالت کے ججز، قانونی افسران اور عدالتی اسٹاف شریک تھے۔ اسلام آباد ہائیکورٹ کی کمرہ عدالت نمبر 2 میں وفاقی آئینی عدالت کا باقاعدہ بورڈ بھی نصب کر دیا گیا ہے، اور چیف جسٹس امین الدین خان آج کچھ دیر بعد پہلے کیس کی سماعت کا آغاز کریں گے۔ اس قدم کے ساتھ وفاقی آئینی عدالت اپنی آئینی ذمہ داریوں کی ادائیگی کے نئے مرحلے میں داخل ہو گئی ہے۔