کراچی میں انٹرمیڈیٹ کے امتحانات میں اعلیٰ پوزیشن حاصل کرنے والے سرکاری کالجز کے طلبا کو شاندار انعامات دیے جائیں گے۔ وزیرِاعظم پروگرام کے تحت، طلبا کو الیکٹرک بائیکس کے ذریعے ان کی محنت کا اعتراف کیا جائے گا۔
چیئرمین اعلیٰ ثانوی تعلیمی بورڈ کراچی، فقیر محمد لاکھو کے مطابق، انسٹیٹیوٹ آف کاسٹ اینڈ مینجمنٹ اکاؤنٹنٹس پاکستان (ICMA) نے پوزیشن ہولڈرز کے لیے مکمل فری اسکالرشپ دینے کا بھی اعلان کیا ہے، تاکہ ہونہار طلبا تعلیم میں مزید ترقی کر سکیں۔ اس حوالے سے ایک خصوصی تقریب کا انعقاد کیا جائے گا، جس میں کراچی کے پوزیشن ہولڈر طلبا، ان کے والدین اور دیگر اہم شخصیات شریک ہوں گی۔ طلبا کو انعام میں دی جانے والی الیکٹرک موٹر سائیکلیں پہلے ہی پہنچا دی گئی ہیں۔ چیئرمین فقیر محمد لاکھو کے مطابق، یہ سلسلہ 2030 تک ہر سال جاری رہے گا، اور ہر سال کے شاندار طلبا کو ان کی محنت کے صلے میں الیکٹرک بائیکس دی جائیں گی۔ واضح رہے کہ وزیرِاعظم محمد شہباز شریف نے ملک بھر کے ہونہار طلبا کو مفت الیکٹرک بائیکس فراہم کرنے کا اعلان کیا تھا۔ اس اسکیم کے تحت، فیڈرل بورڈ سمیت ملک بھر کے تعلیمی بورڈز میں انٹرمیڈیٹ سطح پر اعلیٰ کارکردگی دکھانے والے طلبہ و طالبات کو فائدہ پہنچے گا۔ اس اسکیم میں خواتین کے لیے 25 فیصد خصوصی کوٹہ رکھا گیا ہے جبکہ صوبوں کے تناسب کے مطابق باقی کوٹے مختص کیے گئے ہیں۔ وزیرِاعظم نے بلوچستان کا کوٹہ 10 فیصد تک بڑھانے کی ہدایت بھی کی ہے۔ اس اسکیم کے فوائد صرف طلبا تک محدود نہیں؛ پاکستان میں بیٹری بنانے والی 4 نئی کمپنیاں اپنے آپریشن کا آغاز کر رہی ہیں، جس سے نئے کاروباری مواقع اور روزگار کے مواقع پیدا ہوں گے۔ وزیرِاعظم نے اسکیم کے جلد نفاذ کو یقینی بنانے کی بھی ہدایت دی ہے۔
Discussion about this post