ایشیا کپ کی ٹرافی پر بھارتی بورڈ اور اے سی سی کے درمیان نیا تنازع

بھارتی کرکٹ بورڈ نے ایشیا کپ کی ٹرافی کے حوالے سے ایشین کرکٹ کونسل (ACC) کے صدر محسن نقوی کو باضابطہ خط لکھا ہے، جس کے بعد اے سی سی نے بھی جوابی خط بھیج دیا۔

ذرائع کے مطابق ACC نے بھارتی بورڈ کو واضح کر دیا ہے کہ ٹرافی کی تقریب نومبر کے پہلے ہفتے میں منعقد کی جائے گی، اور تب جا کر ٹرافی وصول کی جا سکتی ہے۔ یہ تقریب دبئی میں منعقد ہوگی۔واضح رہے کہ ایشیا کپ جیتنے کے بعد بھارتی ٹیم نے اسپورٹس مین اسپرٹ کی دھجیاں بکھیرتے ہوئے محسن نقوی سے ٹرافی لینے سے انکار کر دیا تھا۔ بی سی سی آئی نے اس ضمن میں ACC کو باضابطہ آگاہ کیا، جس کے بعد ٹرافی میدان سے واپس منگوا لی گئی۔

ذرائع کے مطابق مودی سرکار اور بھارتی کرکٹ بورڈ کے دباؤ کے باوجود، محسن نقوی نے بھارتی ٹیم کی ہٹ دھرمی قبول کرنے سے انکار کیا اور تقریب کے دوران رنر اپ ٹیم کو انعامات دیے، جبکہ ٹرافی کی تقریب بغیر کسی سمجھوتے کے ختم کر دی گئی۔اب ACC اور بھارتی بورڈ کے درمیان نومبر کے پہلے ہفتے میں ٹرافی کی تقریب کو حتمی شکل دینے کا معاملہ زیر غور ہے، جو اس تنازع کا ممکنہ حل فراہم کر سکتی ہے۔