ارشد ندیم کے کوچ سلمان بٹ پر عائد پابندی ختم

پاکستان اسپورٹس بورڈ (پی ایس بی) نے ارشد ندیم کے کوچ سلمان بٹ پر عائد تاحیات پابندی ختم کر دی ہے۔ یہ فیصلہ پی ایس بی کے ثالث سینیٹر پرویز رشید نے فریقین کے دلائل سننے کے بعد سنایا۔ ثالثی فیصلے کے مطابق ایتھلیٹکس فیڈریشن آف پاکستان نے سلمان بٹ کے خلاف کارروائی میں نہ تو قانونی تقاضے پورے کیے اور نہ ہی انہیں کوئی چارج شیٹ یا سماعت کا موقع فراہم کیا، جس کے باعث پابندی کو غیر قانونی قرار دے دیا گیا۔ فیصلے میں یہ بھی کہا گیا کہ فیڈریشن کی جانب سے عائد پابندی نے نہ صرف سلمان بٹ کی ساکھ کو نقصان پہنچایا بلکہ اس نے قومی ایتھلیٹ ارشد ندیم کی تیاریوں کو بھی متاثر کیا۔

پی ایس بی ایڈجیوڈیکیٹر نے مزید حکم دیا کہ:

• ایتھلیٹکس فیڈریشن سلمان بٹ کے خلاف مزید بیان بازی سے گریز کرے۔

• پنجاب ایتھلیٹکس ایسوسی ایشن کے معاملات فیڈریشن کے دائرہ اختیار میں نہیں آتے۔

• پنجاب ایتھلیٹکس ایسوسی ایشن کے انتخابات پنجاب اسپورٹس بورڈ اور پنجاب اولمپکس کی نگرانی میں ہوئے تھے۔

پی ایس بی نے اے ایف پی کی جانب سے پنجاب ایتھلیٹکس الیکشن کالعدم قرار دینے کا فیصلہ بھی معطل کر دیا ہے۔

واضح رہے کہ ایتھلیٹکس فیڈریشن نے سلمان بٹ پر تاحیات پابندی عائد کی تھی، جسے انہوں نے پی ایس بی کے آئین کے تحت چیلنج کیا تھا۔