بھارتی اداکار علی گونی کو جان سے مارنے کی دھمکیاں

بھارت کے معروف ٹی وی اداکار علی گونی نے انکشاف کیا ہے کہ انہیں صرف اس لیے جان سے مارنے کی دھمکیاں دی جا رہی ہیں کیونکہ انہوں نے ہندو مذہب کا مخصوص نعرہ لگانے سے انکار کیا۔سوشل میڈیا پر اپنے بیان میں علی گونی نے انتہا پسند عناصر کی کھل کر مذمت کی اور کہا کہ مذہب ہر فرد کا ذاتی معاملہ ہے۔ "کسی کو یہ حق نہیں پہنچتا کہ وہ کسی پر زبردستی مذہبی نعرہ یا رسم و رواج مسلط کرے،” انہوں نے کہا۔ اداکار نے واضح کیا کہ نفرت پھیلانے والے عناصر کو بے نقاب کرنا وقت کی ضرورت ہے۔ علی گونی کے مطابق نہ صرف وہ بلکہ ان کی قریبی دوست اور اداکارہ جاسمین بھاسن بھی نشانے پر ہیں، صرف اس لیے کہ وہ ہندو ہیں اور ان کے ساتھ تعلقات میں ہیں۔ انہوں نے انتباہ دیا کہ اگر ان کی ماں، بہن یا کسی قریبی دوست کے خلاف کوئی تضحیک آمیز بات کی گئی تو وہ ہرگز خاموش نہیں رہیں گے۔اداکار کے اس جرات مندانہ مؤقف پر سوشل میڈیا پر مداحوں کی بڑی تعداد ان کے ساتھ کھڑی نظر آ رہی ہے۔ مداحوں نے انہیں اپنی دعاؤں میں یاد رکھا اور ان کے لیے گہری تشویش کا اظہار کیا ہے۔