ٹرمپ کو نوبل انعام نہ مل سکا

رواں سال کا امن کا نوبل انعام 2025 وینزویلا کی جمہوریت نواز رہنما ماریا کورینا مچاڈو کے نام اعلان کیا گیا ہے۔نوبل کمیٹی کے مطابق ماریا کورینا مچاڈو کو یہ اعزاز وینزویلا کے عوام کے جمہوری حقوق کے فروغ اور آمریت سے جمہوریت کی منصفانہ و پُرامن منتقلی کی جدوجہد کے اعتراف میں دیا گیا ہے۔ واضح رہے کہ اس سال امن کے نوبل انعام کے لیے دنیا بھر سے 300 سے زائد افراد اور تنظیمیں نامزد کی گئی تھیں، جن میں 244 افراد اور 94 تنظیمیں شامل ہیں، جو گزشتہ سال کی 286 نامزدگیوں کے مقابلے میں نمایاں اضافہ ہے۔

دلچسپ بات یہ ہے کہ امریکی صدر ڈونلڈ ٹرمپ بھی امن کے نوبل انعام کے لیے نامزد کیے گئے تھے، تاہم وہ اس سال یہ اعزاز حاصل کرنے میں کامیاب نہیں ہوئے۔ناروے کے نوبل انسٹی ٹیوٹ کا کہنا ہے کہ نوبل قوانین کے تحت امیدواروں کی شناخت 50 سال تک خفیہ رکھی جاتی ہے، تاہم کمیٹی انعامی فیصلے کے اعلان کے لیے تجویز کنندہ کا نام ظاہر کرنے کی اجازت رکھتی ہے۔ یہ اعلان عالمی سطح پر جمہوری اقدار کی مضبوطی اور امن کے فروغ کی جانب ایک اہم پیغام سمجھا جا رہا ہے۔