باجوڑ کے پانچ علاقے کلیئر، ریاستی عملداری بحال

ضلعی انتظامیہ کے مطابق سیکیورٹی فورسز نے باجوڑ کے پانچ اہم علاقوں کو کلیئر کر دیا ہے، جہاں اب حالات معمول پر آ گئے ہیں اور ریاست کی مکمل عملداری بحال ہو چکی ہے۔ انتظامیہ کے بیان میں بتایا گیا ہے کہ سیرئے کلان، سری میاں گان، لنڈئے کلان، بلال مسجد ترخو اور شمشیر گر قلعہ ترخو کو مکمل طور پر کلیئر کرایا جا چکا ہے۔ انتظامیہ نے کہا کہ کلیئر کروائے گئے علاقوں کے مکین اب اپنے گھروں کو واپس جا سکتے ہیں، اور ریاست انہیں مکمل سیکیورٹی اور معاونت فراہم کرے گی۔ مزید یہ کہ دیگر متاثرہ علاقوں کے خاندانوں کی واپسی بھی مرحلہ وار مکمل کی جائے گی تاکہ امن و امان کا تسلسل قائم رہے۔