میلبرن اسٹارز کا پاکستانی شائقین کیلئے ’ہاؤس آف رؤف‘ اسٹینڈ بنانے کا اعلان

میلبرن اسٹارز نے اعلان کیا ہے کہ ایم سی جی میں پاکستانی فاسٹ بولر حارث رؤف کے نام سے ایک خصوصی اسٹینڈ قائم کیا جائے گا۔ میلبرن کرکٹ اسٹیڈیم میں بنایا جانے والا یہ اسٹینڈ "ہاؤس آف رؤف” کہلائے گا، جس کا مقصد پاکستانی شائقین اور جنوبی ایشیائی کمیونٹی کو کرکٹ کے کھیل سے مزید قریب لانا ہے۔ اس منفرد اقدام کے لیے حارث رؤف کو مرکزی ایمبیسیڈر مقرر کیا گیا ہے۔

حارث 2019 سے میلبرن اسٹارز کی نمائندگی کر رہے ہیں اور اب تک صرف 22 میچز میں 36 وکٹیں حاصل کر چکے ہیں۔ میلبرن اسٹارز کے جنرل منیجر میکس ایبٹ کے مطابق، "ہاؤس آف رؤف” میں پاکستانی کلچر، کھانے اور موسیقی کے ذریعے ایک ایسا ماحول تیار کیا جائے گا جو بگ بیش کے رنگوں میں مزید نکھار لے کر آئے گا۔ یہ اقدام کرکٹ آسٹریلیا کے "ملٹی کلچرل ایکشن پلان” کا حصہ ہے۔ یاد رہے کہ بگ بیش لیگ کا آغاز 14 دسمبر سے ہوگا، جبکہ میلبرن اسٹارز اپنی مہم 18 دسمبر کو ہوبارٹ ہریکینز کے خلاف شروع کرے گی۔