علیحہ اور عریشہ۔۔پاکستانی نژاد طالبات کا شاندار الوداعی پروجیکٹ

شوگر لینڈ، ٹیکساس کے کلیمنٹس ہائی اسکول کی پاکستانی نژاد طالبات، علیحہ علی اور عریشہ فیصل، نہ صرف اپنی تعلیمی کارکردگی کی بنا پر ممتاز رہیں، بلکہ اپنی تخلیقی سوچ، قیادت اور کمیونٹی سے جڑے رہنے کے جذبے کی بدولت بھی دلوں پر ایک گہرا نقش چھوڑ گئیں۔ اپنی گریجویشن کے موقع پر، ان دونوں ہونہار طالبات نے ایک نہایت دل کو چھو لینے والی، جذبات سے لبریز ویڈیو تیار کی، جو اس وقت نہ صرف اسکول بلکہ پورے ٹیکساس میں بے حد مقبول ہو چکی ہے۔ یہ ویڈیو، جسے "سائننگ آؤٹ” کے نام سے پیش کیا گیا، کلیمنٹس ہائی اسکول کی 2025ء کی گریجویٹنگ کلاس کے 400 طلبہ کو خراجِ تحسین پیش کرنے کے لیے تیار کی گئی۔ اس پراجیکٹ کی پروڈیوسر علیحہ علی جبکہ ڈائریکٹر عریشہ فیصل تھیں، اور دونوں نے مل کر اسے ایک یادگار تخلیق میں ڈھال دیا۔

یہ ویڈیو کلیمنٹس ہائی اسکول کے آفیشل سوشل میڈیا پلیٹ فارمز پر شیئر کی گئی، جہاں اس کی فنی مہارت، جذباتی گہرائی اور پیشکش نے ہر دیکھنے والے کے دل کو چھو لیا۔ فورٹ بینڈ کاؤنٹی کے حکام نے بھی اس پراجیکٹ کو سراہتے ہوئے، علیحہ اور عریشہ کو خراج تحسین پیش کیا اور ان کی قائدانہ صلاحیتوں کی دل کھول کر تعریف کی۔ کلیمنٹس ہائی اسکول، جو فورٹ بینڈ انڈیپنڈنٹ اسکول ڈسٹرکٹ کا حصہ ہے، اپنی ثقافتی تنوع اور بین الاقوامی طلبہ کی بھرپور نمائندگی کے لیے جانا جاتا ہے۔ 80,000 سے زائد طلبہ پر مشتمل اس نظام میں علیحہ اور عریشہ کی کامیابی، جنوبی ایشیائی پس منظر کے نوجوانوں کے لیے ایک روشن   مثال بن چکی ہے۔ اسکول ایڈمنسٹریٹر نے ویڈیو کے بارے میں کہا:
"یہ صرف ایک الوداعی پیغام نہیں تھا، بلکہ ایک جذباتی سفر کی علامت تھی، جس میں طلبہ نے اپنے دلوں کی آواز کو تخلیقی انداز میں پیش کیا۔ اس بات نے سب کو متاثر کیا کہ یہ ویڈیو مکمل طور پر طلبہ نے خود بنائی، جو قیادت، ہنر اور جذبے کا منہ بولتا ثبوت ہے۔”

CTV نیوز بلیٹن کی اینکرز کی حیثیت سے علیحہ اور عریشہ نے ہمیشہ اسکول کی سرگرمیوں، طلبہ کے مسائل اور کمیونٹی کے معاملات کو اجاگر کرنے میں اہم کردار ادا کیا ہے۔ ان کا   یہ آخری پراجیکٹ ایک عام "سینئر سینڈ آف” ویڈیو نہیں بلکہ طلبہ صحافت اور ثقافتی اظہار کا ایک یادگار سنگِ میل ہے۔ علیحہ علی کہتی ہیں:
"یہ پہچان ہمیں اس بات کی یاد دہانی کراتی ہے کہ نمائندگی کتنی اہم ہے۔ یہ صرف تصویر میں نظر آنے کی بات نہیں، بلکہ اپنی کہانی کو باوقار انداز میں سنانے کا موقع حاصل کرنے کی بات ہے۔”

عریشہ فیصل نے اپنے خیالات کا اظہار کرتے ہوئے کہا:
"ہم چاہتے تھے کہ ہر طالب علم خود کو اس ویڈیو کا حصہ محسوس کرے، کیونکہ کلیمنٹس میں ہر سفر اپنی نوعیت کا منفرد ہے۔ یہ ویڈیو ہمارا طریقہ تھا یہ کہنے کا کہ ہم نے یہ سفر مل کر مکمل کیا۔”

علیحہ اور عریشہ کی یہ کاوش نہ صرف میڈیا میں طلبہ کی شمولیت کا خوبصورت مظہر ہے بلکہ ایک ایسا راستہ بھی ہے جو اسکول میڈیا میں متنوع آوازوں اور کہانیوں کے فروغ کا سبب بنے گا۔ جیسے ہی کلیمنٹس ہائی اسکول کی کلاس آف 2025 اپنی نئی منزلوں کی جانب روانہ ہوتی ہے، یہ ویڈیو اور اس سے جڑی یادیں ان کے دلوں میں ہمیشہ زندہ رہیں گی۔