بھارتی سازش ناکام، پاکستان کی کرکٹ ڈپلومیسی کامیاب

بھارت کی جانب سے پاکستان کو کھیلوں کے میدان میں تنہا کرنے کی مہم کو ایک اور بڑا دھچکہ لگا ہے۔ پاکستان کرکٹ بورڈ (پی سی بی) کی مؤثر سفارتی کوششوں کے نتیجے میں بنگلہ دیش کرکٹ ٹیم نے پاکستان کا دورہ کرنے پر آمادگی ظاہر کر دی ہے۔ ذرائع کے مطابق پی سی بی کے چیئرمین محسن نقوی نے اس مقصد کے لیے دبئی کا ہنگامی ایک روزہ دورہ کیا، جہاں انہوں نے بنگلہ دیش کرکٹ بورڈ (بی سی بی) کے اعلیٰ حکام، بشمول چیئرمین اور صدر سے اہم ملاقاتیں کیں۔ کئی گھنٹوں پر محیط ان مذاکرات کے بعد بالآخر بی سی بی کو قائل کر لیا گیا کہ وہ پاکستان آ کر تین میچوں پر مشتمل ٹی ٹوئنٹی سیریز کھیلنے پر رضا مند ہو جائے۔

سیریز کہاں اور کب؟

ابتدائی معاہدے کے مطابق پاکستان اور بنگلہ دیش کے درمیان یہ تین ٹی ٹوئنٹی میچز لاہور میں کھیلے جائیں گے۔ تاہم سیریز کی تاریخوں کا حتمی اعلان جلد متوقع ہے۔یہ فیصلہ پاکستان میں انٹرنیشنل کرکٹ کی بحالی کے تسلسل میں ایک اور اہم قدم ہے۔ گزشتہ برسوں میں زمبابوے، سری لنکا، ویسٹ انڈیز، انگلینڈ اور نیوزی لینڈ کی ٹیموں نے بھی پاکستان کا دورہ کیا، جو بین الاقوامی اعتماد کی بحالی کی عکاسی ہے۔

بھارتی اثر و رسوخ زائل، پاکستان تنہا نہیں

واضح رہے کہ بھارت کی کوشش رہی ہے کہ وہ خطے میں اپنے سیاسی اثر و رسوخ کو استعمال کرتے ہوئے پاکستان کو کرکٹ جیسے عالمی کھیل سے دور رکھے۔ تاہم پاکستان کرکٹ بورڈ کی پروفیشنل قیادت اور مؤثر اسٹریٹیجک رابطوں نے ان تمام سازشوں کو بارہا ناکام بنایا ہے۔ یہ دورہ صرف ایک کرکٹ سیریز نہیں بلکہ اس بات کا ثبوت ہے کہ پاکستان کرکٹ دنیا کے لیے ایک محفوظ، پرجوش اور مستحکم مرکز بنتا جا رہا ہے۔