پاکستان کی شاندار فضائی دفاعی کارروائی نے نہ صرف دشمن کے غرور کو پاش پاش کیا بلکہ عالمی ہتھیاروں کی صنعت پر بھی لرزہ طاری کر دیا۔ پاک فضائیہ نے حالیہ تصادم میں بھارت کے 5 جنگی طیاروں کو کامیابی سے نشانہ بنایا، جن میں بھارتی فضائیہ کے تین جدید ترین رافیل طیارے بھی شامل ہیں۔ رافیل، جسے جدید ٹیکنالوجی، اعلیٰ ترین ایویانکس اور مہنگی قیمت کی علامت سمجھا جاتا ہے، پاکستان کی دفاعی صلاحیتوں کے سامنے زمین بوس ہو گیا۔ ان طیاروں کی ناکامی کے فوری بعد یورپی اسٹاک مارکیٹس میں رافیل تیار کرنے والی فرانسیسی کمپنی ‘ڈسالٹ ایوی ایشن’ کے شیئرز میں نمایاں کمی ریکارڈ کی گئی۔ بین الاقوامی میڈیا اور معاشی تجزیہ کار اس گراوٹ کو براہ راست پاکستان کی فضائی برتری سے جوڑ رہے ہیں۔ ان کا کہنا ہے کہ یہ واقعہ اس حقیقت کو اجاگر کرتا ہے کہ جدید ٹیکنالوجی اور اربوں ڈالر کے اسلحے کے باوجود جنگ کا فیصلہ مہارت، حکمت عملی اور جذبے سے ہوتا ہے، نہ کہ صرف ہتھیاروں کے شور سے۔
بھارت میں جہاں حکومتی حلقے خاموش ہیں، وہیں سوشل میڈیا اور دفاعی تجزیہ کاروں نے بھارتی فضائیہ کی اس ناکامی پر کڑی تنقید کی ہے۔ بہت سے ماہرین کا کہنا ہے کہ یہ واقعہ بھارت کی دفاعی پالیسی پر ایک سوالیہ نشان ہے، جو بھاری سرمایہ کاری کے باوجود زمینی حقیقتوں سے آنکھیں چُرا رہی ہے۔ ادھر پاکستان نے دنیا کو واضح پیغام دے دیا ہے کہ خطے میں امن کی خواہش اپنی جگہ، لیکن جارحیت کی صورت میں ردعمل ایسا ہوگا کہ نہ صرف دشمن کے ارادے، بلکہ اُس کے دفاعی خواب بھی چکناچور ہو جائیں گے۔
Discussion about this post