ہمایوں سعید اب ڈاکٹر حسنات کے کردار میں

ہمایوں سعید کا جب تذکرہ کیا جاتا ہے تو انہیں اُن اداکاروں کی فہرست میں شمار کیا جاتا ہے کہ جو ہمیشہ مختلف اور منفرد کردار ادا کرنے کی کوشش کرتے ہیں۔ اداکاری ہی نہیں اُن کا پروڈکشن ہاؤس بھی ناظرین کے لیے بھرپور تفریح کا سامان رکھتے ڈراماسیریل پیش کرنے میں اپنی مثال آپ ہے ۔ بہرحال اب ان کے پرستاروں کے لیے خوشی کی خبر یہ ہے کہ وہ نیٹ فیلکس کی سیریز” دی کراؤن” کے 5 ویں سیزن میں ڈاکٹر حسنات کا کردار ادا کرنے جارہے ہیں۔ ” دی کراؤن ” دراصل برطانوی شاہی خاندان کے گرد گھومتی سیریز ہے۔

جس میں شہزادی ڈیانا کا کردار آسٹریلوی اداکارہ الزبتھ ڈیبیکی ادا کررہی ہیں۔ ” دی کراؤن” نے ایمی اور گولڈن گلوب ایوارڈ بھی حاصل کررکھا ہے۔ کہا جارہا ہے کہ اس نئے سیزن کا آغازرواں سال ہونے جارہا ہے۔ ہمایوں سعید ڈاکٹر حسنات کا کردار ادا کریں گےاس بات کی تصدیق یا تردید نیٹ فیلکس نے نہیں کی لیکن ذرائع یہی بتاتے ہیں کہ ہمایوں سعید کو یہ کردار مل گیا۔ اس سے قبل یہ خبر گرم تھی کہ یہ کردار فواد خان ادا کریں گے۔ ہمایوں سعید کواس کردارمیں آنے پر ساتھی فنکار مبارک باد دے رہے ہیں۔

ڈاکٹر حسنات اور شہزادی ڈیانا کا تعلق

ڈاکٹر حسنات کا جنم پاکستان میں ہوا اور پھر اعلیٰ تعلیم حاصل کرنے کے بعد انہوں نے لندن کا رخ کیا۔ برطانیہ کے مشہور ہارٹ سرجن کے طور پر شناخت کیے گئے، جنہوں نے کئی اسپتالوں میں خدمات انجام دیں۔ اسی دوران ان کی ملاقات شہزادی ڈیانا سے بھی ہوئی۔ کہا جاتا ہے کہ شہزادی ڈیانا ان کو دل دے بیٹھی تھیں۔ 1997 میں جب شہزادی ڈیانا کار حادثے کا شکار ہوئیں تو  ڈاکٹر حسنات خان نے یہ اقرار کیا کہ شہزادی ڈیانا ان سے شادی کرنے کی خواہش مند تھیں۔

ڈاکٹر حسنات نے2008 میں شہزادی ڈیانا کی موت کی تحقیقاتی پینل کو یہ تحریری بیان بھی دیا کہ شہزادی ڈیانا اُن سے  شادی کرکے پاکستان میں رہنا نہیں چاہتی تھیں اور اسی بات پر دونوں میں علیحدگی ہوئی۔