پاکستان کا برطانیہ سے شہزاد اکبر اور عادل راجہ کی حوالگی کا مطالبہ

وفاقی وزیر داخلہ محسن نقوی نے شہزاد اکبر اور عادل راجہ کی حوالگی سے متعلق اہم دستاویزات برطانوی ہائی کمشنر کے حوالے کر دیں۔ اس حوالے سے محسن نقوی سے برطانیہ کی ہائی کمشنر جین میریٹ نے ملاقات کی، جس میں پاک-برطانیہ تعلقات، باہمی تعاون اور سیکیورٹی سے متعلق امور پر تفصیلی تبادلہ خیال ہوا۔ ملاقات کے دوران وزیر داخلہ نے واضح کیا کہ بیرونِ ملک بیٹھ کر پاکستان مخالف سرگرمیوں میں ملوث افراد کو جلد واپس لانے کے لیے سنجیدہ اقدامات کیے جا رہے ہیں۔ انہوں نے شہزاد اکبر اور عادل راجہ کی فوری حوالگی کا مطالبہ کرتے ہوئے کہا کہ دونوں افراد پاکستان میں مطلوب ہیں اور ان کے خلاف ٹھوس شواہد موجود ہیں۔ محسن نقوی نے اس موقع پر کہا کہ پاکستان آزادیِ اظہار پر مکمل یقین رکھتا ہے، تاہم جھوٹی خبروں اور من گھڑت پروپیگنڈے کو کسی بھی صورت برداشت نہیں کیا جا سکتا۔ بیرون ملک بیٹھ کر ریاستی اداروں کے خلاف جھوٹا بیانیہ پھیلانا اور ہرزہ سرائی کسی بھی ملک کے قوانین کے تحت ناقابل قبول ہے۔

انہوں نے کہا کہ پاکستان مخالف مہم میں ملوث عناصر کی واپسی کے لیے برطانیہ کے مکمل تعاون کا خیر مقدم کیا جائے گا۔ دوسری جانب وزارت داخلہ نے وزارت خارجہ کے ذریعے بھی ان افراد کی حوالگی کا باقاعدہ اور قانونی عمل شروع کر دیا ہے۔