واشنگٹن واقعہ دہشت گردی کے دوبارہ ابھرنے کی تشویشناک علامت ہے

پاکستان نے وائٹ ہاؤس کے قریب فائرنگ کے نتیجے میں امریکی فوجی اہلکار کی ہلاکت پر گہرا افسوس ظاہر کیا ہے اور عالمی برادری سے دہشتگردی کے دوبارہ سر اٹھانے پر فوری نوٹس لینے کا مطالبہ کیا ہے۔ترجمان دفتر خارجہ نے کہا کہ واشنگٹن واقعہ عالمی سطح پر دہشت گردی کے دوبارہ ابھرنے کی تشویشناک علامت ہے۔ پاکستان متاثرہ خاندانوں، امریکی حکومت اور عوام کے ساتھ مکمل ہمدردی کا اظہار کرتا ہے۔ ترجمان نے اس واقعے کو امریکی سرزمین پر دہشتگردانہ کارروائی قرار دیتے ہوئے کہا کہ پاکستان خود گزشتہ دو دہائیوں سے دہشتگردی کے متعدد حملوں کا سامنا کر چکا ہے، اور اس تجربے کی روشنی میں وہ عالمی سطح پر مشترکہ کوششوں کی ضرورت پر زور دیتا ہے۔

بیان میں مزید کہا گیا کہ کئی دہشتگردانہ واقعات کے روابط افغانستان سے منسلک پائے گئے ہیں، اور واشنگٹن میں پیش آنے والا واقعہ سرحد پار دہشتگردی کے بڑھتے ہوئے خطرات کی واضح نشاندہی کرتا ہے۔ پاکستان نے عالمی برادری سے اپیل کی کہ وہ دہشتگردی کے خلاف اقدامات کو مزید تیز کرے اور مشترکہ انسدادِ دہشتگردی کی کوششوں کو مضبوط بنائے، تاکہ مستقبل میں ایسے المناک واقعات کی روک تھام ممکن ہو۔