بیٹے آریان کی منشیات رکھنے کے الزام میں گرفتاری کے بعد شاہ رخ خان کی فلمی مصروفیات بالکل تھم سی گئی تھیں۔ عدالتوں اور وکیلوں کے چکر لگا لگا کر شاہ رخ خان تھک گئے تھے اور یہی وجہ ہے کہ ان کی زیر تکمیل کئی فلمیں تعطل کا بھی شکار ہوگئیں۔ صرف شاہ رخ خان ہی نہیں ان کی اہلیہ گوری خان کی کاروباری مصروفیات بھی متاثر ہوئیں۔ جوڑے کو اس وقت راحت ملی جب آریان خان کو آخر کار ضمانت مل گئی۔ شاہ رخ خان 3ماہ تک فلمی دنیا سے دور رہنے کے بعد اب پھر سے کمر کس کر کیمرے کے سامنے آکھڑے ہوئے ہیں۔ اس وقت ان کی تمام تر توجہ کا مرکز ’پٹھان‘ نامی فلم ہے، جس کی عکس بندی کا پھر سے آغاز ہوگیا ہے۔
سوشل میڈیا پر اسی فلم کی عکس بندی کی ایک تصویر خاصی وائرل ہورہی ہے، جس میں وہ ایک ایکشن منظر کے لیے تیار ہورہے ہیں۔ ’پٹھان‘ میں شاہ رخ خان کی من پسند ہیروئن دپیکا پدوکون شامل ہیں جبکہ جان ابراہم بھی اس تخلیق میں نظر آئیں گے۔ فلم کے لیے شاہ ر خ خان نے خاص طور پر لمبے لمبے بال رکھے ہیں۔ پرستاروں نے بالی وڈ کے بادشاہ کافلمی دنیا میں پھر سے استقبال کرتے ہوئے سوشل میڈیا پر ’شاہ رخ خان‘ کے نام سے ہیش ٹیگ تخلیق کیا ہے۔ جس میں کنگ خان کے لیے نیک خواہشات کا اظہار کیا جارہا ہے۔ یاد رہے کہ ’پٹھان‘ وہی فلم ہے، جس پر انتہا پسند آگ بگولہ تھے، جن کا کہنا تھا کہ اب شاہ رخ خان فلم کے ذریعے بھارت میں ’پٹھان‘ جیسی فلمیں بنا کر طالبان کی سرپرستی کررہے ہیں۔
بہرحال خبریں تو یہ بھی ہیں کہ شاہ رخ خان صرف اسی فلم میں ہی نہیں نئے سال کے آغاز پر ایک ایسی تخلیق میں بھی کام کرنے جارہے ہیں، جس میں ان کے ساتھ سنجے دت بھی شامل ہیں۔
Discussion about this post