دانیال ظفر 12 ویں کھلاڑی کے روپ میں

گلوکار علی ظفر کے بھائی دانیال ظفر اب 12 ویں کھلاڑی بن کر کرکٹ کی دنیا میں قسمت آزمانے والے ہیں اور یہ کام وہ اسکرین پر کریں گے۔  پاکستانی نئی ویب سیریز ” 12 واں کھلاڑی ” کا ٹریلر جاری کردیا گیاہے۔ جو کرکٹ کے دیوانے کے لیے دلچسپی کا باعث بن رہا ہے۔

فلم کی کہانی گھومے گی ایک ایسے جنونی کرکٹر کے گرد جس کی راہ میں رکاوٹیں تو آتی ہیں لیکن اس کے قدم ڈگمگاتے نہیں۔ جو 12 واں کھلاڑی ہوتے ہوئے  ٹیم میں جگہ بنانے کے لیے ہر آگ کے دریا کو پار کرنے کی جدوجہد میں ہے۔  امیری اور غریبی کے ساتھ ساتھ ساتھی مغرور اور خود سر کھلاڑی کے ساتھ مقابلے کی بھی دوڑ رواں دواں ہے۔

ہدایتکار عدنان سرور کی اس تخلیق میں دانیال ظفر ہی نہیں بلکہ یو ٹیوبر شاہویر جعفری بھی ہیں۔ کنزہ ہاشمی ہیروئن کا کردار ادا کررہی ہیں۔ جبکہ اس ویب سیریز  کی خاص بات یہ ہے کہ اس میں فواد خان اور شعیب ملک مہمان اداکار کے طور پر اسکرین پر نظر آئیں گے۔

اسی طرح ویب سیریز  کی پروڈیوسر ماہرہ خان اور نینا کاشف ہیں۔ ” 12 واں کھلاڑی ” میں عثمان پیرزادہ، صبا فیصل، سرمد کھوسٹ اور شفقت چیمہ بھی شامل ہیں۔ کہا جارہا ہے کہ اسے 15 مارچ سے اسٹریمنگ کے لیے پیش کردیا جائے گا۔ ” 12 واں کھلاڑی ” کا ٹریلر دیکھ کر اندازہ ہوتا ہے کہ اس میں ایکشن تو ہے ہی، وہیں کرکٹ ہی اس کا موضوع ہے۔

دانیال ظفر کی اداکاری بھی غیر معمولی رہی ہے، جبھی ان کے چاہنے والے اس تخلیق کا بے چینی سے انتظار کررہے ہیں۔