اب مودی بکتر بند گاڑی میں گھومیں گے

بھارتی غربت، بے روزگاری، بیماری اور مفلسی سے لڑ رہے ہیں لیکن نریندر مودی کو شوق ہے مہنگی سے مہنگی جدید ترین سہولیات والی گاڑی کا۔ حال ہی میں مودی کے لیے مرسیڈیز مے بیچ ایس 650گارڈ خریدی گئی ہے۔ جس کی کم از کم مالیت 12کروڑ روپے سے زیاد ہے۔ اس جدید ترین مہنگی گاڑی کو مودی کی رینج روور وگ ٹویوٹالینڈ کروز ز سے اپ گریڈ کیا گیا ہے۔ اب مودی جی جس گاڑی میں سفر کریں گے وہ بکتر بند ہونے کی صلاحیت رکھتی ہے۔ گاڑی کی خاص بات یہ ہے کہ اس کی نشست مساج کرسکتی ہے۔ جبکہ اس کے اندر ’لیگ روم‘ کی بھی سہولت ہے۔

اس کے علاوہ عقبی نشستوں کو بھی تبدیل کیا جاسکتا ہے۔ یہ جدید ترین گاڑی تحفظ کے لیے اپنی مثال سمجھی جاتی ہے۔ مودی کی یہ گاڑی دھماکہ پروف ہے۔ لیٹر ٹوئن ٹربو وی 12انجن سے آراستہ ہے جبکہ 516کے بریک ہارس پاورکی خوبی بھی اس میں شامل ہے۔ یہ کار زیادہ سے زیادہ 160کلو میٹر فی گھنٹہ کی رفتار سے چل سکتی ہے۔ اس کی باڈی اور کھڑکیوں پر سخت اسٹیل کور ہیں، جو گولی برداشت کرنے کی سکت رکھتی ہیں۔ جبکہ کسی بھی دھماکے کے وقت اس کار پر کوئی اثر نہیں پڑے گا۔ یہاں تک کہ کار میں بیٹھا شخص بھی 15 کلوگرام تک کے ٹی این ٹی دھماکے سے محفوظ رہ سکتا ہے جو صرف 2 میٹر کے فاصلے پر ہوتا ہے۔