کرونا کے بڑھتے کیسز: پھر نئی پابندیاں لگا دی گئیں

وفاقی وزیر منصوبہ بندی اور نیشنل کمانڈ اینڈ آپریشن سینٹر ( این سی او سی ) کے سربراہ اسد عمر نے کرونا وائرس کے حوالے سے نئی پابندیوں کا اعلان کردیا ہے۔

کرونا وائرس کی صورت حال پر میڈیا بریفنگ میں اسد عمر نے کہا کہ ہمیں لوگوں کی صحت اور روزگار کی حفاظت کرنی ہے، وزیراعظم عمران خان سے منظوری لے کر کچھ فیصلے کیے ہیں۔

انہوں نے کہا کہ کرونا وائرس کے باعث اسپتالوں میں مریضوں کی تعداد مسلسل بڑھ رہی ہے، عوام سے اپیل ہے کہ وہ جلد از جلد ویکسین لگوائیں۔

وفاقی وزیر نے کہا کہ حکومت نے کورونا وائرس کے پیش نظر نئی پابندیاں لگائی ہیں، جن کا اطلاق 3 اگست سے 31 اگست تک ہوگا۔

اُن کا کہنا تھا کہ اس دوران ہفتے میں 2 دن کاروبار بند رہے گا، چھٹی کس دن رکھنی ہے یہ فیصلہ صوبے کریں گے۔

اسد عمر نے مزید کہا کہ دفاتر میں حاضری 50 فیصد کرنے کا فیصلہ کیا ہے، جب کہ پبلک ٹرانسپورٹ میں سواریوں کی گنجائش 50 فیصد ہوگی۔

انہوں نے کہا کہ کاروبار کے لیے اوقات رات 8 بجے تک کرنے کا فیصلہ کیا گیا ہے، جس کے بعد مارکیٹیں 8 بجے تک کھلیں گی۔

وفاقی وزیر نے یہ بھی کہاکہ انڈور ڈائننگ بند اور آؤٹ ڈور ڈائننگ کھلی رہیں گی، جو رات 10 بجے تک کھلی رہے گی، جبکہ ٹیک اوے 24 گھنٹے کھلے رہیں گے۔

واضح رہے کہ حکومت سندھ کے اعلان کے بعد کراچی سمیت صوبے بھر میں محدود پیمانے پر لاک ڈاؤن جاری ہے، جس کس اطلاق 8 اگست تک تھا۔