کراچی میں آج بھی گرمی کا راج

مارچ کے موسم میں جون جولائی کی گرمی، شہرقائد میں درجہ حرارت بڑھنے سے شہری رل گئے، مشروبات کے اسٹالز پر بھی عوام کا رش بڑھ گیا۔ محکمہ موسمیات نے خبردار کرتے ہوئے آج بھی موسم شدید گرم رہنے کی پیشگوئی کی ہے۔ موسم کا حال بتانے والوں کے مطابق کراچی میں آج بھی گرمی کا راج ہوگا اور پارہ39ڈگری تک جانے کا امکان ہے، گرمی کی شدت 40 سے41 ڈگری تک محسوس کی جاسکتی ہے۔ کم سے کم درجہ حرارت 23 ڈگری سینٹی گریڈ ریکارڈ کیا گیا۔ اس وقت کراچی شہر کا موجودہ درجہ حرارت 32 ڈگری سینٹی گریڈ ہے جبکہ ہوا میں نمی کا تناسب 38 فیصد ہے۔ محکمہ موسمیات کے مطابق 28 اور 29 مارچ کو گرمی کی شدت میں کمی اور 30 مارچ سے 4 اپریل کے دوران پھر اضافہ ہوگا۔