پاک بحریہ آج بھی ملکی بحری سرحدوں پر آہنی فصیل ہے

پاک بحریہ کے ’’ہنگور ڈے‘‘ کے موقع پر چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر نے قوم کے نام اپنے پیغام میں کہا ہے کہ 1971 کی جنگ میں پاک بحریہ سمندر میں دشمن کے لیے سیسہ پلائی دیوار ثابت ہوئی اور آج بھی ملکی بحری سرحدوں کی آہنی محافظ ہے۔ انہوں نے واضح کیا کہ پاکستان امن کا خواہاں ہے مگر اپنی خودمختاری اور دفاع کے لیے ہر لمحہ پوری قوت کے ساتھ تیارہے۔ فیلڈ مارشل سید عاصم منیر نے آبدوز ہنگور کے بہادر عملے کو خراجِ تحسین پیش کرتے ہوئے کہا کہ 9 دسمبر 1971 کا وہ تاریخی کارنامہ، جس میں ہنگور نے بھارتی جنگی جہاز ککری کو غرق اور کرپان کو شدید نقصان پہنچایا، آج بھی دشمن کے ذہن پر نقش ہے۔ ان کا کہنا تھا کہ یہ دن یاد دلاتا ہے کہ پاکستان نے ہمیشہ بے مثال جرات اور عزم کا مظاہرہ کیا ہے۔ انہوں نے خبردار کیا کہ بھارت کسی غلط فہمی میں نہ رہے، اگر دوبارہ جارحیت کی کوشش کی گئی تو پاکستان کا جواب پہلے سے زیادہ تیز، برق رفتار اور بھرپور ہو گا۔ اس موقع پر پاک بحریہ کے سربراہ ایڈمرل نوید اشرف نے بھی اپنے پیغام میں کہا کہ پاک بحریہ کی شاندار روایات آج بھی اسی جوش اور جذبے کے ساتھ زندہ ہیں۔ انہوں نے بتایا کہ جلد ہی آٹھ جدید ہنگور کلاس آبدوزیں فلیٹ کا حصہ بننے جا رہی ہیں، جو بحری دفاع کو مزید مضبوط کریں گی۔ہنگور ڈے کے حوالے سے پاک بحریہ نے خصوصی دستاویزی فلم ’’ہدف‘‘ بھی جاری کر دی ہے، جو آبدوز ہنگور کے کمانڈنگ آفیسر وائس ایڈمرل (ر) احمد تسنیم کی وار ڈائری پر مبنی ہے اور اس عظیم آپریشن کی تفصیلات کو نئی نسل کے سامنے لے کر آتی ہے۔ ہنگور ڈے بہادری، پیشہ ورانہ مہارت اور پاکستان کے ناقابلِ تسخیر دفاع کی روشن علامت کے طور پر آج بھی پوری شان کے ساتھ منایا جا رہا ہے۔