کامیڈین کپل شرما جب سے مشہور ہوئے ہیں، اُن کے نخرے آسمانوں کو چھونے لگے ہیں۔ یہی وجہ ہے کہ اُن کے انداز اور تیور کسی سپر اسٹار سے کم نہیں۔شہرت اور مقبولیت کے اس عروج پر وہ یہ فراموش کرچکے ہیں کہ ایک فنکار وہی ہوتا ہے جو کسی کو دیے گئے وقت کا خیال رکھے۔ عالم یہ ہوگیا ہے کہ وہ بالی وڈ کے شہنشاہ امیتابھ بچن تک کو خاطر میں نہیں لارہے۔ جبھی اُن کو بھی 4گھنٹے انتظار کی سولی پر لٹکا ئے رکھا۔ امیتابھ بچن ٹی وی شو ’کون بنے گا کروڑ پتی‘ کے ایک اسپیشل پروگرام کی عکس بندی کرنے جارہے تھے۔ جس میں فلم اسٹار سونو سود کے ساتھ ساتھ کامیڈین کپل شرما کو بھی مدعو کیا گیا۔
امیتابھ بچن تو طے شدہ وقت پر اسٹوڈیو میں تھے۔ جس کے چند لمحوں بعد سونو سود بھی پہنچ گئے لیکن کپل شرما کا دور دور تک کوئی اتا پتا نہیں تھا۔ گھڑی کی سوئیاں آگے بڑھتی رہیں۔ یہاں تک کہ 12بجے سے شام کے ساڑھے 4بج گئے۔ جبھی ہنستے مسکراتے ہوئے کپل شرما سیٹ پر پہنچے۔ اس دوران امیتابھ بچن کا غصہ تو ساتویں آسمان پر تھا لیکن پیشہ ورانہ رویہ اختیار کرتے ہوئے وہ چپ ہی رہے۔ کپل شرما اور سونو سود کے ساتھ انہوں نے ’کون بنے گا کروڑ پتی‘ کھیلا۔ لیکن ایک موقع پر مل گیا اُنہیں موقع تو انہوں نے طنزیہ لہجے میں کپل شرما کو مخاطب ہو کر کہا ’ آج آپ ٹھیک ٹائم پر آئے ہیں۔ آپ کو ہم نے ملنا تھا 12بجے، ٹھیک ساڑھے 4بجے آپ آگئے۔‘ امیتابھ بچن کے طنز میں چھپے غصے کو کپل شرما سمجھ تو گئے لیکن کھیسانے ہو کر بس جھینپ مٹا کر ہنساتے ہی چلے گئے۔
View this post on Instagram
بھارتی میڈیا کے مطابق تاخیر سے آنے پرکپل شرما نے بعد میں امیتابھ بچن سے باقاعدہ معذرت بھی کی ۔ کپل شرما اور سونو سود کا یہ پروگرام 12 نومبر کو نشر ہوگا۔ دوسری جانب سوشل میڈیا پر کپل شرما کے اس غیر پیشہ ورانہ رویے پر خاصی تنقید کی جارہی ہے ۔ بیشتر صارفین کا کہنا ہے کہ کامیابی کے خمار میں کپل شرما یہ بات فراموش کرچکے ہیں کہ کیا پیشہ ورانہ فرائض ہوتے ہیں۔
صارفین تو اس بات پر بھی آگ بگولہ ہیں کہ کپل شرما جیسے کامیڈین نے امیتابھ بچن کو انتظار کرایا اور یہ اُن کا ظرف ہے کہ وہ شو چھوڑ کر نہیں گئے ۔اگر یہی حرکت کپل شرما کے کسی مہمان نے کی ہوتی تو وہ اس قدر مغرور ہیں کہ مہمان ہی بدل دیتے۔
Discussion about this post