مسلم لیگ ن کی نائب صدر مریم نواز کے بیٹے جنید صفدر کا شادی لندن میں عائشہ سیف خان سے گزشتہ دنوں ہوئی۔ جس میں لیگی قائد نواز شریف نے بطور خاص شرکت کی جب کہ مریم نواز نے پاکستان میں ویڈیو لنک کے ذریعے بیٹے کی اس خوشی کو براہ راست دیکھا۔
عائشہ سیف خان ، لیگی رہنما سیف الرحمان خان کی صاحبزادی ہیں۔ اس پرمسرت موقع پر جنید اور عائشہ کو ہر جانب سے مبارک باد مل رہی ہیں۔ کپیٹن ( ر) صفدر اور مریم نواز کے صاحبزادے لندن میں زیر تعلیم ہیں جب کہ حال ہی میں انہیں کیمبرج یونیورسٹی کی پولو ٹیم کا کپتان بھی بنایا گیا ہے۔
جنید صفدر نے شادی پر کون سا گانا گایا ؟
جہاں سوشل میڈیا پر اس جوڑے کی کئی تصاویر وائرل ہورہی ہیں۔ وہیں ایک ویڈیو گردش میں ہے جس میں جنید صفدر مشہور فلم ’ ہم کسی سے کم نہیں ٗ کا وہ گیت گا رہے ہیں ، جسے محمد رفیع نے اپنی سریلی آواز میں ریکارڈ کرایا تھا۔
جنید صفدر نے مدھر گلوکاری سے سجا ” کیا ہوا تیرا وعدہ ” اس قدر ڈوب کر گایا کہ ہر کوئی جنید صفدر کا پرستار بن گیا ہے۔ 56 سکینڈز کی اس ویڈیو کو دیکھنے کے بعد سوشل میڈیا پر دلچسپ تبصرے پڑھنے کو مل رہے ہیں۔
کسی نے لکھا کہ مریم نواز کے بیٹے سریلی آواز رکھتے ہیں ، انہیں نانا اور والدہ کی طرح سیاست کے بجائے گلوکاری میں خود کو آزمانا چاہیے۔ اسی طرح کچھ کا خیال ہے کہ شادی کے موقع پر روایتی دلہا کی طرح نروس ہونے کے بجائے جنید صفدر نے جس طرح معیاری اور سریلی گلوکاری کی ، اس کو سننے کے بعد وہ ان کے پرستار ہوگئے ہیں۔
ایک صارف نے جنید صفدر کو پاکستانی ایلوس پریسلے کا خطاب دیا۔ پیپلز پارٹی کی رہنما شرمیلا فاروقی تک جنید صفدر کی گلوکاری کی مداح ہوگئیں۔ ٹوئٹ کرتے ہوئے لکھا کہ جب آپ اپنے نکاح میں اسٹار بن جائیں۔
Discussion about this post